IV Еуразиялық экономикалық форумның басты тақырыбы – Еуразиялық интеграция стратегиясының болашағы. Басқосуда Еуразиялық экономикалық одақ елдерінің энергетика, өнеркәсіп, көлік, қаржы және цифрландыру салаларындағы ынтымақтастықты нығайту мәселесі талқыланды.

Фариза Жанғанева, тілші:

- Биыл Беларусь астанасында ұйымдастырылып отырған Еуразиялық экономикалық форумға 33 елден 2,5 мыңнан астам адам қатысып жатыр. Жиында 6 ірі тақырыптық бөлім бойынша 35 іс-шара өтеді. Онда күн тәртібіндегі кедендік реттеу мен мемлекеттік сатып алудан бастап Еуразия кеңістігіндегі мемлекеттермен ынтымақтастықты кеңейту сияқты жаһандық мәселелерге дейін қамтылады. Осы ретте қатысушылар Еуразиялық бестік елдерінің арасында сауда-саттық қарқынды дамып жатқанын атап өтті. Ұйымға мүше елдердің Иран, Вьетнам, Қытай, Сербиямен сауда келісімдері бар.

Бақытжан Сағынтаев, Еуразиялық экономикалық комиссия алқасының төрағасы:

- Осы 10 жылдың ішінде осы 5 мемлекеттің арасындағы тауар айналымы 100 миллиард АҚШ долларын құрап отыр. Көрсеткіш жылдан жылға өсіп келе жатыр. Сол себептен осындай экономикалық форумда бизнес әлеуетті өкілдердің бәрін шақырып, бір-бірімен араластырып, мүмкіндіктерін көрсетуде тығыз байланыстарды жүргізіп отыр.

Форум аясында басқа өңірлік интеграциялық және халықаралық ұйымдармен диалогқа ерекше назар аударылмақ. Әсіресе, Еуразиялық экономикалық комиссия мен Азиядағы өзара іс-қимыл және сенім шаралары кеңесі хатшылығының арасындағы ынтымақтастықтың маңызы артып келеді — дейді Азия кеңесінің бас хатшысы.

Қайрат Сарыбай, Азия кеңесінің бас хатшысы:

- Біздің кеңістігіміздің өзара тиімді ынтымақтастық үшін кең мүмкіндіктері бүгінгі таңда шынымен де төтенше сын-тегеуріндерге тап болып отыр, көпжақты ынтымақтастық дағдарысы мен сенім дағдарысы бар. Өндірістік-логистикалық тізбектердің бұзылуы байқалып жатыр. Осы қиын кезеңде мемлекетаралық ұйымдардың диалогы Біртұтас Еуразиядағы қауіпсіздік пен қауымдастық кеңістігін құрудың маңызды құрамдас бөлігі болып табылады.

Форум аясында одаққа мүше мемлекет басшыларының қатысуымен пленарлық отырыс жоспарланған. Бұл кездесу Жоғары Еуразиялық экономикалық кеңестің жиынына дейін болады. Осы басқосуда Моңғолия және Біріккен Араб Әмірліктерімен сауда келісімдері бойынша келісімге қол қойылады.

Авторлары: Фариза Жанғанева, Дана Нұржан