Астанадай алып шаһарда автобус жүргізу оңай шаруа емес.

Екінің бірі атқара алмайтын жауапты қызметті бүгінде елордалық Назым Қалиланова абыроймен алып жүр. Жас ана 12 жыл бойы қоғамдық көлікті тізгіндеп келеді.

Екінің бірі автобусты тізгіндей алмайды. Әйелдерді айтпағанда бұл ер-азаматтардың өзі жүрексінетін жұмыс. Ал Назым үшін қоғамдық көлікті басқарудың еш қиындығы жоқ. «Жаның қалап істесең болғаны», - дейді жас ана. Ең бірінші Алматы көшелерінде троллейбус жүргізіп бастапты. Сол кездегі машақаты көп тірлік оның жұмысқа деген құлшынысын еселей түскен.

Назым Қалиланова, қоғамдық көлік жүргізушісі:

-12 жылдай қоғамдық көлік жүргіземін. Ең алғаш рет Алматы қаласында троллейбус жүргіздім. Кейіннен автобусқа ауысып кеттім, Астанаға келгеніме бір жылдай уақыт болды. Қазір Астанада 55 бағдар бойынша жұмыс істеймін. Айырмашылық тек кептелісінде. Алматыда кептеліс көп қой. Астанада көп кептеліс жоқ, сондықтан жеңіл.

Назымның көлікке деген қызығушылығы әкеден дарыған. Бала күннен жанында жүріп темір тұлпардың тілін үйренеді. Кейін ауыл арасы рөлге отырып өздігінше басқарып та жүріпті. Негізі оқып-тоқыған, мамандығы – қаржыгер. Десе де жүрек қалауын орындап, 12 жыл бұрын қоғамдық көлікті тізгіндеп кете барған. Содан бері сүйікті ісінен қол үзген емес. Жолдасымен бірге жемісін көріп келеді.

Нұржан Әлімбеков, Назым Қалиланованың жолдасы :

- 12 жылдан бері қоғамдық көлікте жұмыс істейміз. Қиын кездер болды, бірақ өзі әбден бала күнінен үйреніп қалған. Мерекесімен құттықтаймын! Зор денсаулық, жұмыста қызметте табыс тілеймін. Отбасында береке-ынтымақ, бірлік болсын. Қуанышты, бақытты күндеріміз көп болсын!

Қызметтегі Назым сағатпен санаспай, тәулікпен таласпайды. Таң арайлап атқаннан бастап, кеш қарайғанға дейін жүретін кездері жиі болады екен. Еңбекқор жан елордадағы ең ұзақ 55-ші бағдарды таңдап алған. Тұрақты жолаушылары да бар. Желіге шыққанда жазбай танып жататын көрінеді.

Назым Қалиланова, қоғамдық көлік жүргізушісі:

- Амандасып кіретіндер бар. Көбіне үлкен кісілер отыратын. Сол кісілер: «өзіңе отырып жатырмыз», — деп айтатын. Студент қыздарым бар, Кенесарының бойында отыратын. «Сізді күтіп тұрмыз ғой», — деп айтып жүреді.

Ерге тән жұмысты ауыр деп қашпаған қайсар қыздың қызметі абыройлы. Әріптестері де жұмысына адал, еңбекқор деп сыйпаттады. Түздегі ісін тиянақты атқарып жүрген Назым бүтін бір үйдің түтінін түтетіп отыр. 3 баланың аяулы анасы.