Сан ғасырлық дәстүрлерді жаңғырту үшін қоғамда адами құндылықтарды насихаттап, болашақ ұрпақтың бойына сіңіру керек. «Сенімен болашақ» қауымдастығының негізін қалаушы Нұркен Асанов осындай пікірде, деп хабарлайды 24kz.

Қоғам белсендісі, игі бастама ретінде халқымыздың қасиетті Рамазан айындағы ауызашар беру дәстүрін насихаттап жүр. Яғни, күні бойы ораза ұстаған көпшілікті үйге шақырып, дастарханнан дәм татқызып қана қоймай, салт бойынша қонақтарға сый-сыяпат жасалуы керек. Ән-мен күйден шашу шашып, жарапазан айтқан жөн. Бұның бәрі бауырмалдыққа үндейді. «Сенімен болашақ» қауымдастығы салт-дәстүрімізді насихаттау арқылы жас ұрпақтың бойына игі қасиеттерді сіңіруді көздейді.

Нұркен Асанов, қоғам қайраткері, «Сенімен болашақ» РҚБ-нің негізін қалаушы:

- Ұлттық құндылықтарды дәріптеу үшін біз қоғамда адами құндылықтарды сіңіруіміз керек. Көпұлтты елде адами құндылықтарды дәріптемесек, біз ешқашан ұлттық құндылықтарымызды тұғырына отырғыза алмаймыз. Сондықтан әрқашан адам тұрған жерде адамның құндылықтарын ескере отырып, ар-ождан, мейірімді насихаттасақ, өскелең ұрпағымыз өзінің ұлттық құндылықтарына берік болады деген менде үміт.