Жамбыл облысында жедел жәрдем қызметкеріне оқ атылды, деп хабарлайды 24KZ. Жүрек тұсынан жарақат алған фельдшер аман қалды. Оқыс оқиға бүгін Байзақ ауданындағы орталық ауруханада болған. Жедел жәрдем қызметкеріне танысы келіп, науқастарға арналған дефибриляторды қолданып көруді сұраған. Бірақ оны беруден бас тартқаны үшін араларында жанжал басталған. Сол сәтте күдікті травматикалық тапаншамен медицина қызметкерін атып жіберген. Қазір қару қолданған 25 жастағы күдікті қамауға алынып, сотқа дейінгі тергеу басталды.

Сержан Назарбек, Денсаулық сақтау басқармасының басшысы:

- Қазіргі таңда біздің фельдшердің жағдайы тұрақты. Бірінші хирургиялық өңдеу жасалынды. Қазіргі таңда палатада ем алып жатыр. Қызметкердің сол жақ жүрек тұсына оқ тиген. 1 см тереңдіктен біздің хирургтер соны шығарып, полиция қызметкерлеріне беріп отыр.