Қызылорда облысында су шығынын жою үшін нақты жоспар құрып, үнемдеу технологияларын кеңінен енгізу қажет. Су арналарын бетондау жұмыстарын да қолға алу маңызды. Бұл туралы аймаққа сапары барысында Премьер-министрдің орынбасары Қанат Бозымбаев мәлімдеді.

Вице-премьер алқап басына барып, егіннің жағдайын көзбен көрді. Мемлекет тарапынан жасалатын қолдау шараларына тоқталды.

Қазалыда 260 гектар жүгері алқабы жаңбырлатып суару технологиясымен өсіріледі. Бұл жүйені шаруашылық екі жыл бұрын енгізді. Осылайша, тіршілік нәрін дәстүрлі әдіспен салыстырғанда үш есе үнемдеген. Үкімет басшысының орынбасары бұл агротехнологияның тиімділігін бағамдады.

Дастан Садықов, агроном:

- Бұл жерде суарып тұрғанда жүйе жасанды интеллекті бар. Өзі айтып тұрады, алда күн ыстық келе жатыр 40-50 градуста, қазір 55 мм су құю керек деп. Біз соны автоматты түрде қосып, 50 мм қазір құйып келе жатыр. Алда бір жұмадан кейін күн қатты ыстық болады.

Ауданда 18 мың 245 гектар жерге егін егу жоспарланған. Бірақ суармалы судың аздығынан күріш көлемі 800 гектарға қысқарды. Жалпы егін суаруға 295 миллион текше метр су қажет. Бірақ бұл меже 259 миллион текше метрден аспай тұр

Еркін Сейітов, Қазалы аудандық ауыл шаруашылығы бөлімінің басшысы:

- Суды талап ететін атыздарды тастап, қазіргі уақыттта 800 гектарға қысқарттық күріш көлемін. Соның есебімен қазіргі уақытта осы егіс көлемін алып келе жатырмыз. Жалпы аудан бойынша 42 насос бар. Оның ішінде округтердің құрамындағы және «Казводхоздың» құрамындағы үш насосымыз бар, шаруашылықтардың 9 насосы бар, Төтенші жағдайлар министрлігінен 4 насос келіп отыр.

Қанат Бозымбаев Басықара су торабының да жағдайымен танысты. Аудандағы басты су арналары толық тазаланған. Үкімет басшысының орынбасары су шығынын барынша азайту үшін нақты жоспар әзірлеу қажеттігін айтты.

Қанат Бозымбаев, ҚР Премьер- министрінің орынбасары:

- Біз суды Өзбекстаннан сатып аламыз, Қырғызстаннан сатып аламыз. Оларда электр энергия қымбат болып жатыр. Су үшін сатып аламыз. Суды жібер ағайын деп. Мына жақа келе салып 40% шығындар болып жатыр. Соның бәрін қолға алу керек. Бірінші шығындарды азайту. Екінші тиімділігін көтеру. Олсыз болмайды.

Алдағы уақытта су үнемдеу технологияларын мемлекет 80%-ке дейін субсидиялайды. Өңірде 5 магистральді және 3 шаруашылықаралық канал арқылы кезектестіріп су беру кестесі енгізілген. Облыс бойынша жалпы егістің 98%-і кезекпен суарылады.

Авторлары: Нұрлан Жақыпбеков, Нұржан Мұзарапшин, Айтмұхамбет Байділдаев