Халықаралық білім сайысында елдің атын шығарып, жүлделі оралған оқушы да, пән мұғалімі де Президенттің қолынан марапат алды.

Австралияда өткен әлем біріншілігі – математика олимпиадасында қола жүлдені иемденген Ерқанат Кеңшілік бір апта бұрын озат оқушылармен бірге Ақордаға шықырылып мемлекет басшысының алғысын алып еді. Енді Ұстаздар жиынында пән мұғаліміне «Ерен еңбегі үшін» медалі берілді.

Аян Сәбитовтың бала оқытып жүргеніне 17 жыл болды. Павлодар қаласында педагогика университетін тәмәмдаған соң, өзі білім алған мектеп-лицейде еңбек жолын бастаған. Кейін Алматы, Астана, Ақтөбе қалаларында табысты еңбек етті. Осы жылдар аралығында талай оқушыны түрлі олимпиадаларға дайындады.

Аян Сәбитов, облыстық Білім-инновация лицей-интернатының мұғалімі:

- Өзім оқушы кезімнен олимпиадаларға дайындалғанмын. Ұстаздық жолым басталғаннан кейін оқушылармен бірге олимпиадалармен айналысуды бастадым. Осы уақытқа дейін оқушылар жыл сайын жаман емес жетістіктерге жетіп, облыстық, республикалық, әртүрлі халықаралық олимпиадаларда төбе көрсетіп жүр.

Білікті ұстаз лицейде математика үйірмесін де жүргізеді. Оқушыларды 7-сыныптан бастап күрделі есеп-қисап шығаруға баулиды. Жаз мезгіліне қарамастан үйірменің үздіктері оқудан қол үзбеген.

Алдияр Тақауов, облыстық Білім-инновация лицей-интернатының оқушысы:

- Басқа пәндерден бөлек математика өзінің логика атмосферасымен ерекшеленеді. Мысалы, комбинаторика деген бөлімді алсақ, математикадан біз түрлі түрлі логикалық есептерді шығара білеміз. Әрине, оған көп тәжірибе керек. Сондықтан Аян ағай көп үлес қосты.

Алтынгүл Дүзімова, облыстық Білім-инновация лицей-интернаты директорының оқу жөніндегі орынбасары:

- Баламен бірге ата-анамен де жұмыс істейді. Өйткені сабақтан кейін уақытта өзінің сол айналасындағы олимпиадаға қатысатын балалардың ата-аналарын бөлек шақырып сөйлеседі. Әр ата-анаға баланың олимпиадаға дайындалу уақыты, қалай дайындалады, қанша есеп шығарады, соның барлығын жеткізіп отырады. Олимпиадаға қатысатын балалардың ата-аналарымен бірге кітап оқуды да ұйымдастырады.

Аян Сәбитовтің оқушысы Ерқанат Кеңшілік биыл Австралияда өткен әлем біріншілігі – математика олимпиадасында қола жүлдені иемденді. Ақтөбелік жас талант жүзден астам елден жиналған зияткерлер арасында үздіктер қатарынан табылды. Саналы ұрпақ тәрбиесіне үлес қосқан мұғалім болса «Ерен еңбегі үшін» мемлекеттік медалімен марапатталды.

Мансұр Есқожин, Айнадин Молдабеков, Айбек Даутов, 24КZ