Алматыда дәстүрлі республикалық дирижерлер конкурсы басталды. Байқау Халық қаһарманы, күйші, композитор, дирижер Нұрғиса Тілендиевтің 100 жылдығына арналып отыр.

Ел аймақтарынан келген 18 бен 35 жас аралығындағы талантты 24 үміткер «Отырар сазы» Академиялық фольклорлы-этнографиялық оркестрінің сүйемелдеуімен үш туынды орындайды. Мақсат – жастардың дирижерлік шеберлігін жетілдіру. Байқауда дирижерлардың монуалдық техникасы, оркестрмен үндестігі, шығарманың иірімдерін бере білуі сарапқа салынады. Жарыс 10 қазанда қорытындыланады. Жеңімпаздар марапатталып, соңынан гала-концерт береді.

Дінзухра Тілендиева, Н.Тілендиевтің қызы:

- Байқау Отырар сазы оркестрімен өтеді. Қуанышқа орай биыл 24 дирижер қатысып отыр. Бұл сан дирижер конкурсына аз емес. Өзім консерваторияда оқығанда курста екі-ақ дирижер студент оқыдық. Соған қарағанда 24 үміткер өте көп деп ойлаймын. Өте қуанарлық жақсы нәрсе.

Айтқали Жайымов, дирижер, Қазақстанның Еңбек сіңірген қайраткері:

- Оның әрбір шығармасында үлкен оқиға жатыр. Үлкен пәлсапа жатыр. Дирижер соны қалай түсінеді, жеткізеді? Әр мамандықтың өзіндің техникасы болады ғой. Негізінен қолдың техникасы дегендей. Сол қолдың техникасы қалай меңгерілген? Орындаушылар бірден түсініп жатыр ма? Сосын тұрысы да ескеріледі.