Астанада жастардың ойынға тәуелді болуына жол бермеу үшін жаңа шара басталды, деп хабарлайды Sn.kz ақпарат порталы.

Қалалық әкімдіктің «Астана жастары» орталығы «Jarqyn Bolashaq» жобасы аясында көшеде арнайы ақпараттық акция өткізді. Мұндағы мақсат – жастарды құмар ойынның қаупінен сақтандыру, санасын улайтын тәуелділіктен қорғау, уақытында көмек сұраудың жолын түсіндіру.

Шараға шыққан волонтёрлер қала көшелерімен жүріп, халыққа ақпараттық буклеттер таратты. Онда ойынға тәуелділіктің белгілері, оның адамға тигізер зияны және қайда жүгінуге болатыны қысқа әрі анық көрсетілген. Буклетті қолына алған әрбір тұрғын бірінші кезекте: «Осыны бұрын білсем ғой» деп таңданды.

Көшеде жүрген жұрттың өзі де бұл мәселеден қашып құтыла алмайтынын айтты. Акцияны көрген халықтың сөздері де қоғамдағы шынайы жағдайды ашып берді.

Қала тұрғындары не дейді?

Айман есімді қала тұрғыны

«Қазір телефоннан ойын ойнаудың өзі әдетке айналып кетті. Көп жастар тәулігімен отырады. Ата-аналар да баласының не ойнап отырғанын қарамайды. Осындай шаралар керек. Әйтпесе, ертең бәріміз кеш оянамыз», – деді ол алаң көңілмен.

Университет студенті Данияр

«Басында жай ермек еді. Кейін ақшамен ойнап көрдім, содан басталды. Бір-екі рет ұтқаннан кейін тоқтай алмай қаласың. Уақыт, күш, ақша – бәрі кетеді. Маған осындай кеңес беретін адамдар сол кезде кездессе ғой», – деп ойын ашық айтты.

Зейнеткер Қали ақсақал:

«Біздің кезде ондай жоқ еді. Қазір бала түгілі үлкендер де тәуелді болып жатыр. Телефон деген қауіпті нәрсе болды. Жастарға дұрыс бағыт көрсететін мұндай шаралар азаймасын», – деді ақсақал.

Мектеп оқушысы Әсем (16 жаста):

«Менің достарым да онлайн ойын ойнайды. Біреуі ақша салғанын айтты. Қатты қорқып кеттім. Бүгін таратқан қағаздан көп нәрсе білдім. Қайда хабарласуға болатынын көріп, өзіме сақтап қойдым», – деді жасөспірім.

Лудомания деген не?

Волонтёрлердің айтуынша, лудомания – жай әдет емес, адамның өмірін өзгертетін қауіпті тәуелділік. Бір рет ойнап, ойламаған жерден жеңіске жеткен адам кейін соны қайта сезгісі келіп, тоқтай алмай қалады.