0:00:00

Жаңалықтарды Telegram арнамыздан оқыңыз!

Түркістан облысындағы Ақсу-Жабағылы қорығы сирек кездесетін өсімдіктер мен жануарлардың отаны. Мұнда қызыл кітапқа енген сүтқоректілердің 52, өсімдіктердің 1400 ден астам түрі бар. Сондықтан ерекше қорғауды талап етеді. Яғни қорық қауіпсіздігін қамтамасыз етіп жүрген қорықшылардың жауапкершілігі жоғары. Ал осы қауіпті қызметті еңсеріп жүрген жандардың күнделікті тіршілігі жайында тілшіміз баяндайды.

Таудың ішінде түрлі қауіп қатерге қарамастан, жалғыз аяқ жолмен келе жатқан аттылы азаматтар — Ақсу жабағылы қорығында қызмет етеді. Соның бірі – Дінмұхаммед Ерікұлы. Ол бала күнінен қорықшы болуды армандағанын айтады. Биыл жауапты қызметті атқарып жүргеніне үшінші жыл. Сөзінше қорықтағы аңдарға қауіп браконьерлерден келеді. Олар жұрт ұйқыға кеткенде аңшылыққа шығатын көрінеді. Сондықтан табиғат күзетшілері рейдтік шараларды жиі ұйымдастырады. Ондай кезде уақытпен санаспай, жұмыс істеуге тура келеді, дейді.

Дінмұхаммед Ерікұлы, қорықшы:

Кейде азанда шығамыз. Таңғы 6-5 терден бастап, 3-4 күндік рейдке кетеміз. Түнгі рейд те жүреді. Түнгі рейд кезінде сағат кешкі бестен таңға дейін рейд жасаймыз.

Ақсу Жабағылы қорығы 128 мың гектарға жуық аумақты алып жатыр. Қорық тіршілігі жыл он екі ай тоқтамайды. Өйткені әр маусымның өзіндік ерекшелігі мен міндеті бар. Таулы мекенде қызмет атқару әсте оңай емес. Сол үшін мұндағы негізгі көлік – ат. Олар үшін де мұнда барлық жағдай жасалған. Жем – шөп жеткілікті. Ал қажет болған жағдайда көмекке арнайы техникалар да келеді. Қазір, мұнда қар барысы, Тянь- Шань арқары, қоңыр аю сынды сирек кездесетін жануарлар мекендейді.

Нұрсұлтан Бексейітов, күзет бөлімінің басшысы:

Негізгі мекендейтін жануарлар жабайы шошқа, тауешкі, сібір тауешкісі, Түркістан сілеусіні және тағы басқа аңдар мекендейді. Қазіргі уақытта заман талабына сай түнгі көру құрылғыларымен түнгі уақыттарда шығады. Кешкі уақытта шықса азанға дейін осы қызметте болады.

Қорықтың тыныштығын күзетумен қатар, қызметкерлер мұндағы әрбір тіршілікті, әрбір құбылысты бақылауға алып, күнделікті қағазға түсіріп отырады. Әрі тәулік бойы, ауа-райының қандай да бір қолайсыз жағдайы болса да өз жұмыстарын атқаруға міндетті. Өйткені, оларға табиғат байлығын қору — сеніп тапсырылған.

Айнұр Әбілқасымқызы