Премьер-министр Олжас Бектенов су тасқынына қарсы шараларды үйлестіру жөніндегі республикалық штаб отырысын өткізді, деп хабарлайды 24KZ. Онда өңірлердегі гидрометеорологиялық жағдай туралы баяндалды. Сонымен қатар су нысандарының жай-күйі жайында мәлімет берілді. Өзге де жауапты тұлғалар мен бірқатар өңір басшысы елді мекендердегі дайындық барысын хабардар етті. Олжас Бектенов жағдайды тәулік бойы мониторингілеуді тапсырды.

Қазір елдің 67%-і қар жамылып жатыр. Солтүстік және орталық бөлікте тоң қалың. Қостанай, Павлодар облыстарында 1,5 метрден асса, Қарағанды, Ақмола өңірінде 130 сантиметрден қалың тоң бар. Ал Қызылорда, Түркістан, Жамбыл, Батыс Қазақстан, Атырау мен Маңғыстау облыстарында қар ери бастаған. Наурыз бен сәуір әдеттегіден жылы болады деп болжанып отыр. Жауын-шашын да мол түсуі ықтимал. Бұл құбылыстар тасқынның алдын алуға қам-қарекетті күшейтуді қажет етеді.

Ерлан Нысанбаев, Экология және табиғи ресурстар министрі:

- Наурыз айында температураның көтерілуі мен жаңбыр түріндегі қатты жауын-шашын болған жағдайда тау өзендерінен еріген қар суынан болатын тасқын жүруі мүмкін. Елдің орталық, солтүстік және шығыс бөлігінде қар жиналу үрдісі жалғасып жатыр. Бұл жауын шашынның мөлшері айлық нормадан бірнеше есе көп түсуіне әкелді.

Әсіресе Шығыс Қазақстан, Қарағанды, Ақмола, Солтүстік Қазақстан, Қостанай, Ақтөбе, Абай, Ұлытау облыстарында қарғын су молаюы мүмкін. Тағы Алматы, Жетісу, Жамбыл, Батыс Қазақстан және Атырау облыстарында су жиналуы орташа деңгейде болады деп күтіліп отыр. Қазір өзендерде мұз жару жұмыстары басталған.

Нариман Төреғалиев, Батыс Қазақстан облысының әкімі:

- Жайық өзеніне Иреклі су қоймасынан 1-2 млрд текше метр су келеді деп болжанып отыр. Аталған көлемде су келетін болса, Жайық өз су деңгейі Орал қаласында 550-650 см шамасында ғана болады. Қазіргі таңда облыс бойынша 916 мың текше метр қар шығарылды.

Қазір тәулік бойы әуеден бақылау жасалып отыр. Азаматтық қорғау қызметтерімен қатар министрлікте 1 мыңға жуық құтқарушы, 120 техника, 150-ден аса су айдау және жүзу құралының резерві бар.

Шыңғыс Әрінов, ҚР Төтенше жағдайлар министрі:

- Қажет болған жағдайда Ұлттық ұланның және ҰҚК әуе көлігі, сонымен қатар ҚТЖ теміржол көлігі тартылады. Инертті материалдардың, құм толтырылған қаптар мен жанар-жағармай материалдарының қорлары, азаматарды уақытша орналастыру пункттері дайындалды.

Олжас Бектенов: «Аймақтардың дайындығы жоғары деңгейде болуы керек», –деді. Биыл Қазгидромет мамандары алғаш рет әр өңір бойынша талдау жасап, егжей-тегжейлі бақылау нәтижелерін ұсынды. Әкімдіктердің дер кезінде дұрыс әрекет етуі маңызды.

Олжас Бектенов, ҚР Премьер-министрі:

- Су өткізу құрылыстары, көпірлер мен тюбингтер қатып қалған мұз бен қоқыстардан тазартылып, қарғын суды өткізіп жіберуге дайын болуы тиіс. Өзен арналарын тазартып, бекіту қажет. Суға кетуге бейім елді мекендерде күштер мен құралдарды, оның ішінде тиісті техниканы дайындау қажет. Эвакуация орындарын анықтаңыздар. Олар тіршілікке қажетті барлық құралдармен жабдықталуы тиіс.

Авторлары: Рухани Әбдірахман, Досхан Қораз