0:00:00

Жаңалықтарды Telegram арнамыздан оқыңыз!

Су тасу қаупі бар өңірлердің бірі – Ақтөбе. Биыл мұнда жылдағыдан екі есе көп қар түсті. Қазір облыс орталығы мен он екі ауданда тасқынға қарсы жұмыстар үздіксіз жүріп жатыр. Әсіресе, былтыр су астында қалған елді мекендер ерекше назарға алынған.

Бұл Алға ауданындағы Шадияр Мұхаметалиннің шаруа қожалығы. Дәл бір жыл бұрын үй мен мұндағы қора-қопсы қарғын судың ортасында қалып, біраз шығын келген еді. Судың деңгейі бір жарым метрге дейін көтерілген. Қожалық иесі соңғы бір жылда шаруашылығын қайта тіктеп, тасқынға қарсы дайындық жұмыстарын жүргізген. Сондықтан, қорқынышым сейілді дейді.

Шадияр Мұхаметалин, қожалық иесі:

Былтырғыдай су жоқ. Қардың еріп, жерге сіңуі жақсы жалпы. Сосын былтырғыға қарағанда жердің тоңы жоқ, тоң кетіп жатыр. 30 сантиметрдей тоң кетті. Сосын қожалық айналасында бөгет жасап, дамба жасап, жалпы көктемге дайынбыз .

Тасқынға қарсы жұмыстар аудан орталықтары мен шағын ауылдарда да қолға алынған. Мәселен, тек Алға ауданының өзінде елуден астам техника көшелердің қарын шығарып жатыр. Арықтарды тазартуға еріктілер де тартылды. Тасқын қаупі жоғары елдімекендер Тамды және Елек өзендеріне жақын орналасқан.

Асланбек Шүйіншәлиев, Алға ауданының әкімі:

Қаупі бар елді мекендер деп саналатын — Алға қаласы, Есет батыр ауылы және сәл Маржанбұлақ ауылы. Маржанбұлақта «Жол картасы» негізінде бөгеттер, каналдар салынды. Есет батыр ауылында Бұлақ деген, Көсем деген бөгеттер бар, оларға жөндеу жұмыстары жүргізілді.

Облыс аумағында өзен-көлдердегі мұздың көбесі сөгіле қойған жоқ. Қазір арықтар мен су өткізу құбырлары тазартылып жатыр. Қорғаныс бөгеттері де салынған. Құм толтырылған қаптар дайындалып, өзендерде мұз жару жұмыстары жүруде. Синоптиктер бүгіннен бастап өңірде күн күрт жылынады деп отыр. Яғни, қауіп те ұлғаяды. Осы уақытқа дейін облыс орталығынан қала сыртындағы мынадай полигондарға 450 мың текше метрден астам қар шығарылған.

Ақтөбе қаласының аумағында бау-бақша ұжымдарына қауіп бар. Сондықтан Төтенше жағдайлар департаментінің қызметкерлері өзен бойындағы 1800-ден астам үйді аралап, түсіндіру жұмыстарын жүргізген.

Айбат Жаңабергенов,ТЖД бастығының орынбасары:

Жылы температура болғаннан кейін Шалқар және Ақтөбе қаласында көшені су алу фактілері тіркелді. Оған біздің атқарушы орган мен біздің Төтенше жағдайлар қызметі бірлесіп, су сору құрылғыларымен кедергілерді жойды. Айта кету керек, ешкімнің ауласына, үйіне су кіру деректері тіркелген жоқ.

Облыстық Төтенше жағдайлар департаментінің қызметкерлері аудандарға көмекке аттанды. Қауіпті аумақтарға техникалар мен қажетті құрал-жабдықтар толықтай жеткізілді.