Жаңалықтарды Telegram арнамыздан оқыңыз!

Өзіндік ерекшелігі, дәстүрі мен жөн-жоралғысы қалыптасқан мерекені еліміздің төрт түкпiрi түрлiше атап өтеді. Осы уақытқа дейін батыс аймақта тойланып келген мейрам кейінгі жылдары жалпыхалықтық сипат ала бастады.

Көрісу тойдың қызығын көру үшін алматылық тұрғындар Көктөбеге жиылды. Мұнда әуелеген ән айтылды, күмбірлеген күй де шертілді. Жиналғандар амандасып, қауышып, ақ мол болсын десіп жатты біріне-бірі.

Роза Рымбаева, Қазақстанның Халық әртісі:

Наурыз мерекесі елімізге береке-бірлік әкелсін. Жерімізге көп астық әкелсін. Ақ мол болсын, халқымыз береке мен бірлікте өмір сүріп, жаңа өмірді жыл сайын үлкен қуанышпенен бастай берсін.

Амал мерекесін атыраулықтар да дүркіретіп тойлап жатыр. Жұртшылық жылдағы дәстүрге сай Исатай-Махамбет алаңына жиналып, мерекелік концертті тамашалады. Мұндағы өзге ұлт өкілдері де көрісу күнін көппен бірге атап өтуді әдетке айналдырған.

Людмила Ли, «Тхониль-Атырау» этномәдени қоғамдық бірлестігінің төрағасы:

Бәріміз осы мерекені асыға күтеміз. Өйткені бұл мейрам әр халықтың басын бір шаңыраққа біріктіреді. Біз қазақ халқының әр мерекесінен қалыс қалмаймыз, себебі олармен бірге жүріп, ынтымақ-бірлігімізді нығайтып, бір үйдің баласындай араласып кеттік.

Көркем көрініс, әдемі әсер! Айтулы күні Ақтөбеде 100 ене мен 100 келін шеруі өтті. Олар ұлттық киіммен Есет батыр шағын ауданының басты көшесімен жүріп өтіп, мерекелік шаралар өтіп жатқан мәдениет үйінің алдына аялдады. Қариялар бір-бірімен көрісіп, айшықты мейраммен құттықтаса, келіндер үлкендерге сәлем салды.

Бұл күні үш жүздің басын қосқан Ордабасы жерінде Түркістан облысы мен Шымкент жұртшылығы көрісіп, елдің ырыс-ынтымағын арттыратын айрықша мейрамды ерекше салтанатпен атап өтті. Түркістанның ел ағалары қоржынға салынған сый-сыяпаттарын ұсынса, ордабасылықтар ұлттық тағамдардардан дастархан жайды. Ер азаматтарға әдемі тақиялар таратылып, әжелерге ақ жаулық орамалдар жабылды.

Айзада Әріпханқызы, Ордабасы ауданының тұрғыны:

Қыстан аман-есен шығып, күллі тіршілік тіріліп жатқан кез. Жер-ана, табиғат жылып жатқан кез. Бір-біріне деген адал ниетін білдіретін дәстүріміз — көрісу бұл.

Қайта жаңарған Амал мерекесі Ертіс-Баян өңірінде соңғы бірнеше жылда ғана насихаттала бастады. Мерейлі мерекенің мазмұнын арттыру үшін «Аманат» партиясының Павлодардағы филиалы кешенді шара ұйымдастырды. Алдымен қарт адамдарға құрмет көрсетіп, одан кейін студенттерді атаулы күнмен құттықтады. Жастармен салт-дәстүр, әдет-ғұрып, ұлттық ойындарды дамытудың жаңаша әдістері жайлы ой өрбітті.

Дариға Жүсіп, Марғұлан университетінің жастар саясаты департаментінің маманы:

«Аманат» партиясының «Жастар рухы», «Жастар қанаты» біздің университетте өте белсенді дамыған. Әрбір іс-шараға қатысады. Қазіргі жастарға Көрісу күнін көрсету өте маңызды болды. Олардың бір-бірімен тек құшақтасып көрісуі емес, бір-біріне деген сый-сияпатын, тәрбиесін, ытымақтастығын көрсетіп жатыр.

Еліміздегі Наурызнама онкүндігі осылай басталды. Нағыз думанның лебі сезіледі. Бұл – жер әлем жаңа кезеңге бет алар шақ.

Ернұр Медет