Бүгінде медициналық оңалту – міндетті әлеуметтік медициналық сақтандыру пакетіндегі бағасы қымбат әрі өте өзекті қызметтің бірі десек те болады. Өйткені, оңалтудан өту – инсульт немесе жарақат алған, тізе, жамбас буындарын алмастырған, түрлі созылмалы ауруларға шалдыққан науқастар үшін ауадай қажет.

Мәселен, 2025 жылы Алматы қаласында МӘМС пакеті шеңберіндегі реабилитациялық қызметтерге 8 млрд теңгеге жуық қаржы қарастырылған. Сонымен сақтандыру арқылы медициналық оңалтудан кімдер өте алады? Реабилитациядан өту жолдары қандай? Осы және өзге де сауалдарға Медициналық сақтандыру қорының Алматы филиалы өкілдері төмендегідей жауап берді.

Медициналық оңалту қызметін қандай клиникалар көрсетеді?

2025 жылы Алматыда 81 ұйым медициналық оңалту қызметін көрсетуге тапсырыс алды. Бұл тізімге енген емханалар, ауруханалар, жеке меншік медицина орталықтары, оңалту және спорттық-оңалту кешендері, шипажай кешендері, медициналық-әлеуметтік мекемелер, емдеу-сауықтыру кешендері бар. Тізіммен Қордың msqory.kz ресми сайты арқылы танысуға болады.

Медициналық оңалту кімдерге көрсетіледі?

Реабилитациядан:

- негізгі немесе созылмалы ауруды емдеу қажет болғанда;

- инсульт т.б. сынды ауыр науқастардан кейін;

- кейбір хирургиялық операциялардан кейін;

- жарақат алғаннан кейін;

- сырқат салдарынан адамның қимыл-қозғалысы шектелген жағдайларда өтуге болады.

Бұрын оңалтудан өтіп көрмеген пациент неден бастағаны жөн?

Кез келген пациент медициналық қызметке жүгіну үшін ең алдымен тіркелген емханасына барады.

Емдеуші дәрігер реабилитолог маманнан немесе мультидисциплинарлық топ мамандарынан консультация алуға жібереді.

Мамандар дерттің пайда болуы мен меңдеуін, сырқаттың денсаулық жағдайына байланысты мәліметтерді ескере отырып, оңалтуға деген қажеттілік бар-жоғын айқындайды. Бастапқы реабилитациялық диагноз қойып, пациент денсаулығын қалпына келтіру жоспарын, курстың мерзімін т.б. анықтайды.

Егер кешенді тексеру нәтижесінде реабилитация тиімді деп табылса, пациент оңалтудан амбулаторияда, стационарда, стационарды алмастыратын емдеу мекемесінде, үйде өте алады. Жоспарлы түрде ем қабылдайтын пациент стационарға «Ауруханаға жатқызу бюросы» порталы арқылы жатқызылады.

Медициналық оңалту үш кезеңнен тұрады

Біріншісі ауруы асқынып тұрған науқастарға, хирургиялық операция жасатқан, жарақат алған адамдарға арналған. Ол стационарлардың құрылымдық бөлімшелерінде жүргізіледі.

Егер ауруханаға жатқызу қажет болмаса, медициналық көмек көрсетілгеннен кейін және негізгі ауру емделіп болғаннан кейін пациент оңалтудың екінші немесе үшінші кезеңіне жіберіледі.

Оңалтудың екінші кезеңі мамандандырылған бөлімшелерде немесе республикалық денсаулық сақтау ұйымдары, мамандандырылған оңалту орталықтары мен көпбейінді стационарлар базасында өтеді. Бұл кезең ауру басталған сәттен бастап алты ай ішінде жүргізу қажет.

Үшінші кезеңде медициналық оңалту емхана-амбулатория деңгейінде, күндізгі және тәулік бойғы стационарларда, оңалту орталықтарында, санаторийлер мен курорттарда, үйдегі стационар жағдайында, сондай-ақ қашықтықтан жүргізіледі.

АЛМАТЫ