Астана қаласы әкімдігіне қарасты Музыкалық жас көрермен театрында өнер жолына түсіп, театрда табысқан жұптар көп. Бүгінге дейін ұжымда, санап қарасақ, сахнада жарасып, бір-біріне үйленіп отбасын құрған 15 жұп бар екен. 16 наурыз – Шаңырақ күні қарсаңында театр­да танысып, табысқан сондай бақытты жандар қатары және бір отбасымен толығып, он алтыншы жұптың ақ некесі қиылды.

Қазақ мәдениетінде шаңы­рақ­тың қадір-қасиеті айрықша. Ол – әрі аспан күмбезі, әрі үй-жай, әрі тірек, әрі бай-қуат­ты­лық пен қауіпсіздік һәм ұр­пақтар сабақтастығының белгісі. Ата-баба салтындағы осы бір «Шаңырақ көтеру» атты ерекше дәстүрді насихаттауды мақсат тұтқан айтулы шараға қазақтың Қыз Жібегі, Қазақстанның еңбек сіңірген әртісі, «Құрмет», «Парасат» ордендерінің иегері Меруерт Өтекешева, Қазақстанның еңбек сіңірген қайраткерлері Қанат пен Света Айтбаевтар, сонымен қатар Астана қаласы Ырыскелді қажы мешітінің бас имамы, белгілі дінтанушы-ғалым Нұрлан Байжігітұлы қатысты. Тәрбиелік мәні зор тағылымды шараны Музыкалық жас көрермен театрының директоры, Қазақстанның еңбек сіңірген қайраткері Асхат Мақсымұлы тізгіндеді.

«Театр ішінде былтырдан бастап ерекше Наурызнама бас­талып, қазақтың ұлттық құнды­лық­тарын, рухани келбетімізді көрсететін үлкен іс-шаралар өтіп жатыр. Театрымыз ашылғалы бері төрт жарым жыл ішінде ұжымымызда 15 жұп шаңырақ көтеріп, отбасылы болды. Бүгін, міне, тағы бір одақ – театрда танысып, табысқан 16-жұп үлкен үлкен өмірге қадам басқалы отыр. Екеуіне өнер мен өмір жолында арман да, мақсат та ортақ болсын деп тілейміз!», деп ақ тілегін жеткізді Асхат Маемиров.

Іс-шара барысында неке қию рәсімімен қатар театр әртістерінің орындауында әсем әндер шырқалып, күмбірлеген күй тартылды. Жас отбасына бата беріліп, ақжарма тілектер айтылды. Отбасылық құндылықтар дәріптелді. Ал ша­ңырақ көтеріп жатқан Айдос Амандықтың айтуынша, Наурыз мерекесінің жаңа тұжырымдамасы аясындағы «Шаңырақ күні» келешекте жалпыұлттық отбасылық құн­дылықтар мен кіршіксіз махаббат күніне айналады деуге негіз бар.

«Шаңырақ күні халқымыз жас ұрпақты тәрбиелеу мәдениетін көрсете отырып, олардың бойы­на ұлтжандылық мен адам­гер­шілікті қалыптастыруға үндейді. Бүгін мұсылманша һәм заңды некемізді киелі сахнада Шаңырақ күнінде қиып жатырмыз. Біз – театрда табысқан 16-жұппыз. Бұл біз үшін екі есе бақыт. Алдымызда үйленген аға-әпкелеріміз қазір үбірлі-шүбірлі, берекесі мен бірлігі жарасқан жарасымды отбасына айналып отыр. Алдағы уақытта да осы игі дәстүр жалғасады деп ойлаймыз», деген актёр сүйгенімен қалай танысқанын да айтып берді: «Осы театрда 2023 жылдан бас­тап жұмыс істеп келе жатырмыз. Жарымның аты – Айдана Болат. Университетке құжат тапсырып, талапкер болып келіп тұрғанымызда танысып, дос болып кеттік. Күләш Байсейітова атындағы Қазақ ұлттық өнер университетінде Асхат Маемиров шеберханасында бірге оқыдық. Екі жыл дос болып араласқаннан кейін се­зі­мім­ді білдірдім. Қыз бен жігіт болып сөз байластық. Енді, міне, шаңырақ көтергелі отырмыз», деп ағынан жарылды актёр.

Театр ішіндегі айрықша оқиға – қос актёрдің неке қию рәсіміне жиналған қонақтар жастарға жүрекжарды лебізін білдіріп, бір-біріне деген іңкәр сезімдерінің мәңгілік болуын, ел мен жұрттың тек алғысына бөленіп, өмір мен өнер жолында бақтарының баянды болуын тіледі.