"Qazaq Culture" платформасында елдің тарихи-мәдени мұрасы цифрландырылатын жеке модуль іске қосылмақ.

Енді азаматтар үйден шықпай-ақ отандық музейлер мен театрларды, көрмелерді тамашалай алады. Бұл туралы Мәдениет және ақпарат министрі Аида Балаева Үкімет отырысында айтты, деп хабарлайды inbusiness.kz сайты.

Министрлік жасанды интеллектті қолданатын 4 цифрлық бастаманы жүзеге асырып келеді. Біріншісі – "Қазақстанның тарихи-мәдени мұрасын цифрландыру".

"Қазіргі уақытта Министрлік аясында "Qazaq Culture" ақпараттық-ағартушылық платформасы жұмыс істейді. Платформа 8 тілде қолжетімді: қазақ, ағылшын, орыс, түрік, қытай, араб, испан, француз. "Qazaq Culture" платформасы Қазақстанның мәдени құндылықтары туралы тек қазақстандық емес, сонымен қатар шетелдік аудиторияға да ақпарат таратады", — деді Аида Балаева.

Жобаны кеңейту аясында Қазақстанның тарихи-мәдени мұрасы, құнды экспонаттар мен сирек кездесетін жәдігерлер цифрландырылатын жеке модуль іске қосылады.

"Негізгі мақсат – үйден шықпай-ақ Қазақстан музейлері мен театрларын, көрмелерін тамашалау, Қазақстандық телевизияның алтын қорымен танысу", — деп атап өтті министр.