Павлодарда «Оюлар сөйлейді» тақырыбында сән көрмесі ашылды. Дизайнерлер ұлттық киімді заманға сай ыңғайлап, күнделікті өмірде киюге қолайлы үлгілерін ұсынды. «Қазір қазақы нақыштағы киімге сұраныс жоғары», – дейді шеберлер. Өңірде үлттық киім тігін цехтар ашылып, жаңа брендтер мен дүкендер пайда болды.

Қарлығаш Қасиетова, тілші:

- Иә, дизайнерлер көрмені «оюлар сөйлейді» деп атаған екен. Ертеде ұзатылған қыз барған жеріндегі жағдайын кестедегі өрнек арқылы жеткізгенін тарихи деректерден білеміз. Бұл жерде де «қазақы нақышта тігілген киімдегі ою-өрнектерде терең мағына жатыр, – дейді жоба авторлары. «Ұлттық құндылықтарды баланың бойына жастайынан сіңіру керек», – дейді олар. Жас сәбилерге арналған топтамаға тұсау кесуге арналған қазақы үлгідегі костюмдер кіреді. Балалардың күнделікті киетін киімдерінің өзі ұлттық стильде тігілген.

Ұлттық киімдерді бұрын тек өнер адамдары сахнаға киіп шығатын. Ата-әжелеріміз шапан, камзол, желетке киіп жүретін. Қазіргі қоғамда қазақша киімдерге ерекше қызығушылық байқалады. Павлодарда наурыз айы туғаннан бүкіл мемлекеттік қызметкерлер, компаниялар, білім беру салалары ұлттық киімге көшеді. Бұл өте әдемі көрініс. Тағы бір ерекшелік, соңғы кезде киімдер көзіміз үйренген барқыттан емес, твид матасынан тігіліп жатыр. Сапасы жағынан қазақтың шапандары Еуропаның сән үйлерінің стилінде тігілген киімдерден кем түспейді.

Көрмеге ұлттық нақыштағы киім үлгілерімен қатар түрлі бұйымдар әкелінген. Қолөнер шеберлері киіз үй пішінді сөмкелерді көпшілік назарына ұсынып отыр.

Этностильдегі әр бұйымның алар орны ерекше. Кезінде қыз балалар басына үкілі тақия киіп, қос бұрымына шолпы, шашбау таққан ғой. Ал біздің дизайнерлер шашқапты қайта жаңғыртты. Бұл көпшілік үшін де тың жаңалық болуы мүмкін. Шашқап дегеніміз қыздардың бұрымын шаң-тозаңнан, күннің көзінен қорғайтын қазақтың ұмыт болған бас киімінің бірі екен. Бүгін оның жаңа нұсқасын көрдік.