Лос-Анджелесте қазақ дәмханасы бар. Жерлестеріміздің жарты жыл бұрын ғана бастаған шағын кәсібі жырақта жүрген отандастарымызбен қатар, америкалықтарға да ұнай бастаған. «Нарын» деп аталатын фуд-трак Лос-Анжелестегі қазақ тағамын дайындайтын алғашқы дәмхана. Кәсіпті екі отбасы бірігіп ашқан. Мәзірінде нарын, қуырдақ, палау, тұшпара, самса, тандыр нан мен көже бар. Жақында ашылса да, тағамы жұрттың көңілінен шығып, келушілер қарасы көбейген. Күніне жүзге жуық қонақ келетін дәмхана АҚШ-тағы жерлестеріміз бен Орталық Азия елдерінен шыққан азаматтардың бас қосатын сүйікті орнына да айналып келе жатыр.

Салтанат Адырбаева, кәсіпкер:

-Мақсатымыз – қазақтың тамағын өз қолымыздан беру. Өйткені нарынды өзіміз тураймыз. Қатты уақытты қажет ететін нәрселер. Қазір бешбармақ бере бастадық. Сол арқылы клиенттеріміз көбейіп жатыр. Бизнестен плюсқа шықпадық. Бірақ өзін-өзі жауып отыр.

Нұрбол Қосшыбек, Лос-анджелес тұрғыны:

-Мен өте қуанамын, қазақ ретінде, бауырлар. Әрі осы жерге келіп, бір-бірімізді көріп, осы арада қазақ бауырлармен, жігіттермен танысып жатырмыз. Бұл да бір қазақтардың жиналып, бас қосуына себепкер негізі.

Upd: 18.03.2025, 20:18