Қазақстандықтар өзгерістер дәуірінде өмір сүріп жатыр.

Мәжіліс төрағасы Ерлан Қошанов Конституциялық сотқа қазақстандықтардан қанша өтініш түскенін айтты, деп хабарлайды inbusiness.kz сайты.

"Осыдан үш жыл бұрын, дәл осы залда, Мемлекет басшысы Қасым-Жомарт Кемелұлы Тоқаев халыққа тарихи Жолдауын жариялады. Ол уақыт әлем үшін де, Қазақстан үшін де алмағайып, күрделі сынақтардың кезеңі болғанын білесіздер. Пандемия індеті дүрбелең туғызды. Жаһандық және аймақтық қақтығыстар, санкциялық соғыстар белең алды. Біздің елге де оңай тиген жоқ. Науқаншылдықтан, жасандылықтан қажыған қоғамның өзі екіұдай көңіл-күйде болды. Тіпті, мемлекеттің тәуелсіздігі мен тұтастығына қатер төнген сәттерді бастан өткердік", — деді Қошанов.

Алдымызда күрделі жол, күрмеулі таңдау тұрды. Соның бәріне қарамай, сын сағатта Президентіміз елмен бірге болып, қиындықтарды абыроймен еңсердік, деп атап өтті Мәжіліс спикері.

Ерлан Қошанов Мемлекет басшысының үш жыл бұрынғы "Жаңа Қазақстан: жаңару мен жаңғыру жолы" атты халыққа Жолдауы сын-қатерлерге берілген кесімді әрі нақты жауап болғанын баса айтты.

"Шын мәнінде, Жаңа, Әділетті Қазақстан – қол жетпес арман емес. Ол – халқымыздың талап-тілегінен, қоғамның сұранысынан туындаған қажеттілік, өмірдің шындығы. Ал, реформалар жай ғана заңды өзгерту емес, тұтас мемлекет пен қоғамның болмыс-бітімін жаңарту, жаңғырту. Әлемде жетістікке жетудің әмбебап моделі жоқ. Жалпыға ортақ принциптер ғана бар.

Ол – әділдік, еркіндік және даму. Президент қолға алған реформалардың да түпкі мәні – осы", — деп жалғастырды Қошанов.

Мәжіліс спикері біз қазір мүлде жаңа, өзгерістер дәуірінде өмір сүріп жатқанымызды атап өтті.

"Сол тарихи үдерістердің куәгері әрі қатысушысы бола тұра, оның маңызын әрдайым терең сезіне бермейміз. Оны үйреншікті, күнделікті жағдай сияқты көреміз. Ал, шын мәнінде, кез келген тарихи, тағдырлы оқиғаларға өз уақытында, лайықты баға берілуі керек", — деді ол.

Айта кету керек, осыған дейін Мәжіліс спикері 3 жылдың ішінде елімізде қандай өзгерістер болғанын айтқанын жазғанбыз.