Семей қаласының соты оқушыны аяусыз соққыға жыққан жасөспірімдерге қатысты үкім шығарды, деп хабарлайды El.kz ақпарат агенттігі.

Stan.kz таратқан мәліметке сүйенсек, 18 наурызда өткен сот отырысы жабық жағдайда өтті. Судья бес азаматтық істі қарап, жасөспірімдерді девиантты мінез-құлқы бар балаларға арналған арнайы мектепке жіберу және бір айыпталушыны ерекше режимдегі мектепке орналастыру мәселелерін қарастырды.

Сот анықтағандай, жасөспірімдер Л. мен Т. зардап шеккен баланы өз үйінің ауласында кездестірген. Л. мен Б. арасында қақтығыс туындап, ол ұрысқа ұласқан. Кейін оларға М., В., С. және Ш. қосылып, зардап шеккен балаға талаптар қойған.

Л., Т., М. және В. зардап шеккен Б-ны котельня аумағына апарып, оған дене жарақатын салған. Осы сәтте М., В. және Ш. оқиғаны телефонға түсіріп, кейін видео қаладағы пабликтерде жарияланды, – делінген соттың баспасөз қызметінің хабарламасында.

Сот үш жасөспірімге қатысты талап арызды қанағаттандырудан бас тартты. Оның себебі – екеуі 11 жасқа толмаған, ал заң бойынша арнайы мектепке тек 11 жастан бастап орналастыруға болады. Ал оқиғаны видеоға түсірген 12 жастағы қыз бұған дейін құқық бұзушылық жасамаған және жақсы оқығандықтан, арнайы есепке алынбаған. Бірақ ювеналды полицияда есепке қойылды.

Үш жасөспірімді сот арнайы мектепке жіберу туралы шешім қабылдады.

13 және 16 жастағы екі қыз девиантты мінез-құлығы бар балаларға арналған арнайы мектепке төрт ай мерзімге жіберілді. Сот олардың бірінің білім алудан тұрақты түрде бас тартқанын анықтады. Сонымен қатар, бұл қыздардың спирттік ішімдік ішіп, түнде ересектерсіз үйден шыққаны белгілі болды. Егер мінез-құлқында оң өзгерістер болмаса, мерзім білім беру ұйымының өтініші бойынша ұзартылуы мүмкін, – деді Абай облысының кәмелетке толмағандар ісі жөніндегі мамандандырылған ауданаралық сотының төрағасы Қарлығаш Қасымова.

Сондай-ақ, 13 жастағы бір ұл ерекше режимдегі мектепке алты айға жіберілді.

Ол биыл екі ай ішінде екі қылмыс жасаған, бірақ кәмелетке толмағандықтан қылмыстық жауапкершілікке тартылмады. Ұрлық пен бұзақылық бойынша екі іс те тоқтатылды. Оның өкінгенін ескере отырып, ерекше режимдегі мектепке алты ай мерзімге орналастыру туралы шешім қабылданды, – деп толықтырды Қарлығаш Қасымова.

Сот шешімі кәмелетке толмағандардың тәрбиесін қатаң бақылау қажеттігін көрсетіп отыр. Бұл жағдай жасөспірімдер арасындағы құқық бұзушылықтың алдын алу үшін ата-аналар мен қоғамға үлкен жауапкершілік жүктейді.