Депутат парламенттің жалпы отырысында ұлттық идеология туралы сөз қозғады.

Мәжіліс депутаты, "Ақ жол" фракциясының мүшесі Қазыбек Иса ұлттық идеология негізі мемлекеттік тіл екенін айтып, жасанды ақылды қазақша сөйлетудің маңыздылығына тоқталды. Сондай-ақ ол жас ұрпақты отансүйгіштікке тәрбиелейтін шараларға тоқталды.

"Тарихтан белгілі, қандай ел болса да, Ұлттық идея болмаса, дамуы қарқынды болмайды! Кеше өткен Ұлттық Құрылтайда мемлекет басшысы тапсырған мемлекеттің ішкі саясат тұжырымдасын жасауды тапсыруы – Ұлттық идеологияның бастамасы екені анық. Қазақстанның Ұлттық идеологиялық концепциясын жасаған партия ретінде "Ақ жол" ішкі саясат тұжырымдамасын жасауға өз үлесін қоса алады. Ал Ұлттық бірегейлікке бастайтын Ұлттық идеологияның негізі – мемлекеттік тіл! Әлемдік тәжірибеден әйгілі жайт – кез келген мемлекеттің азаматтарын біріктіретін басты құрал – мемлекеттік тілі", – деді Қазыбек Иса.

Осы орайда депутат жасанды интеллектіге қазақ тілін енгізудің маңыздылығына тоқталып, мемлекеттік тілді дамытуға үлес қосуға шақырды.

Оқи отырыңыз: Мұғалімдердің жалақысы үш есе өсті – мәжіліс депутаты Асхат Аймағамбетов

"Ғылымның, жаһанды жаулап келе жатқан жасанды интеллектінің негізі мемлекеттік тіл болуына баса назар аударған мемлекет басшысы Қасым-Жомарт Тоқаев: "Қазақ тілі – ұлттық бірегейлігіміздің нышаны. Ел бірлігін нығайта түсетін басты құндылығымыз!" – деп, атап көрсеткендей, бірегей ұлтқа айналуда мемлекеттік тілдің мерейі артуын іске асыруға бәріміз өз үлесімізді қосуға тиіспіз", – деді Қазыбек Иса.

Сондай-ақ ол "Алтын Орданың нағыз мұрагері – Ақордалы Қазақ Елі!" деп тарихи мерекелік іс-шаралардың маңыздылығына тоқталды.

"Жас ұрпаққа патриоттық тәрбие беруде тамырымыздың тереңдігін, тарихымыздың кемелдігін көрсететін Қазақ хандарының бабасы, Алтын Орданың атасы Жошы хан құрған, Ұлық Ұлыстың негізі қаланғанына 800 жыл толуын мерекелеу ұлттық рухымызды көтеріп кеткен елдік маңызы ерекше зор рухани серпіліс болды", – деп қосты депутат.