Олардың бәрі әртүрлі саладан келген.

Мәжіліс төрағасы Ерлан Қошанов заң шығару ісіне партиялар мен сындарлы оппозициялық топ өкілдері келгенін айтты, деп хабарлайды inbusiness.kz сайты.

Елімізде партиялық тізімдер мен бір мандатты округтер бойынша аралас сайлау жүйесін енгізілді.

"Қоғам еңсесін көтеріп, болашаққа деген сеніммен белсенді түрде жаңа көшбасшылар іздей бастады. Мәселен, тек елорданың өзінде бір мандатты округтер бойынша бір орынға алпысқа дейін адам үміткер болды. Бәсекелі және әділ сайлау қорытындысы бойынша еліміздің түбегейлі жаңа өкілді органы құрылды. Мәжіліске өткен алты партия тәжірибесіне қарамастан, мандаттарға ғана емес, палатада басшылық лауазымдарға орналасу құқығына ие болды. Бұл – өз сайлауалды тұғырнамалары мен міндеттемелерін іске асыру үшін үлкен мүмкіндік", — деді Ерлан Қошанов Мәжілістің жалпы отырысында.

Осылайша бір мандатты округтерде қатаң бәсекелестіктен өткен жаңа депутаттар қатарға қосылды. Депутаттық корпус түбегейлі жаңарды, деп атап өтті ол.

"Заң шығару ісіне партиялар мен сындарлы оппозициялық топ өкілдері келді. Бұған дейін Мәжіліс тек партиялық тізім бойынша қалыптасып, оның басым бөлігін жүйелі түрде бұрынғы шақырылымның депутаттары құрайтын. Олардың дені мемлекеттік қызметтегі немесе мемлекеттік қызметтің айналасындағы адамдар болатын. Жаңа Мәжілісте депутаттық корпустың 70%-ы жаңарды. Оның бәрі – әртүрлі саладан келген жаңа тұлғалар", — деді Мәжіліс спикері.