Әкімдік қарбалас уақыттағы кептеліс мәселесін осылай шешпекші .

Күні кеше Мәслихатта қаладағы мекемелердің жұмыс кестесіне өзгерістер енгізу бастамасы көтерілген болатын. Қала әкімдігі кейбір мекемелердің жұмысын 30 минутқа ерте бастауды ұсынды. Астананың Мәслихат төрағасы Табиғат Зейнұлқабден осы тақырыпқа қатысты пікір білдірді, деп хабарлайды inbusiness.kz сайты.

"Қалада таңғы және кешкі уақыттарда кептелістер пайда болады. Әсіресе, бұл аралықта сол және оң жағалау арасында жүріп-тұру қиын. Қазір жұмыс кестелері қарастырылып жатыр. Бірі жұмысын ерте бастаса, екіншісі сәл кешірек бастайды дегендей", — деді Табиғат Зейнұлқабден Мәжіліс кулуарында.

Айтуынша, бұл қарбалас уақыттағы кептеліс мәселесінің шешілуіне оң ықпал етуі мүмкін.

Тілшілер тиісті шешім қашан қабылданатынын сұрады.

"Жақын арада қабылданады. Біз қосымша хабарлаймыз", — деп жауап берді қалалық Мәслихат төрағасы.

Табиғат Зейнұлқабден елорда мекемелерінің жұмыс уақытын қысқарту мәселесі қаралып жатпағанын баса айтты.

"Жұмыс уақытын қысқарту мәселесі тұрған жоқ, оны реттеу мәселесі қарастырылып жатыр. 8 сағаттық жұмыс кестесі болады. Бірақ біреуі жұмысын ерте, біреуі кеш бастайтын болады", — деп атап өтті ол.