Каспий су тұщыту зауытының өндірістік қуаты екі есеге ұлғайып, тәулігіне 40 мың текше метр ауыз су шығаруға жетті.

Бұған дейін кәсіпорын күніне 20 мың текше метр су өндіретін, деп жазады inbusiness.kz сайты.

Зауытты жаңғырту Мемлекет басшысының тапсырмасымен жүзеге асырылды. 2021 жылы басталған қайта жаңғырту жұмыстары 2023 жылдың желтоқсанында аяқталды. Кәсіпорын директоры Серік Гусманның айтуынша, бұл жұмыстарға мемлекеттен 17 млрд теңге бөлінген.

— Жаңғырту аясында жаңа ангарлар салынды, ірі қондырғылар орнатылды. Сонымен қатар 30-дан астам жаңа жұмыс орны ашылып, қазір кәсіпорында 160 адам тұрақты еңбек етіп жатыр. Қазіргі таңда зауыт Мұнайлы мен Қарақия аудандарынан бөлек, Ақтау қаласына қосымша 17 мың текше метр ауыз су беруде, — деді Серік Гусман.

Алдағы уақытта зауыттың қуатын тәулігіне 100 мың текше метрге дейін арттыру жоспарланып отыр. Келесі кезеңде 60 мың текше метр су тұщытатын жаңа нысан салу көзделген. Бұл жобаның сметалық құжаттары биыл әзірлене бастайды.