Түркістан облысының тұрғындары 100 мың түп ағаш көшетін екті. Жаңару күніне орай бұл үрдіс еліміздің барлық аймағында жалғасты. Шымкент, Тараз және Талдықорған қаласында да тал егіліп, ағаштардың түбі әктелді. Өңірлерде ағаш егу науқаны қалай жүргізілді? Қандай көшеттер егілді?

Жандос Жұмабек, тілші:

- Біз қазір қаладағы «Жібек жолы» саябағындамыз. Мұнда таңмен таласа тұрып, Жаңару күнінен жақсылық, өзгеріс күткен мыңға жуық қала тұрғыны таңғы 8-ден бастап ағаш егу жұмыстарына кірісті. Табиғат жанашырлары Ұлыстың ұлы күні қарсаңында қаланың ең көрікті жеріне қарағай, шырша секілді қылқан жапырақты ағаштар мен терек, үйеңкі көшеттерін отырғызды.

Саябақ аумағында түске дейін 3 мыңға жуық көшет сап түзеді. Қала бойынша он мың түп көшет егілді. Бұл үрдіс облыстағы аудан-қалаларда да жалғасты.

Болысбек Шәріпбеков, облыстық Табиғи ресурстар және табиғат пайдалануды реттеу басқармасы басшысының орынбасары:

- Бүгін біз жоспарға сәйкес, облыс көлемінде 100 мыңнан аса көшет егеміз. Одан бөлек, биыл біз облыстың елді мекендерін көгалдандыру үшін 1,2 млн көшет егуді жоспарлап отырмыз.

Ал Шымкентте Жаңару күніне орай 1000 түп ағаш көшеті егілді. Наурыз мерекесі қарсаңында экология акциясы ұйымдастырылып, тазалық жұмыстары жүргізілді.

«Таза өлке» және «Рақмет, Жер ана» деген ұранмен жүздеген адам «Мәртөбе» тарихи-мәдени кешені аумағында бұлақ көзін ашып, ағаш түптерін ақтады.

Досыбай Шерімқұлов, мемлекет және қоғам қайраткері:

- Мақсатымыз – мына жастарды жинап бұл төбенің қадір-қасиетін біліп, елдің тарихын, қазақтың тарихын білу. Кейін аманат ретінде жалғастырып отыру үшін істеліп отыр. Бұл жерде небір зиялылар үлкен әңгімелер айтқан.

Ағаш егу шарасы Талдықорған қаласында да жалғасты. «Таза Қазақстан» акциясы аясында өңір тұрғындары 150 түп қылқанжапырақты ағаш көшетін екті. Қаратал өзенінің бойындағы саябақтың шеткі бөлігі жасыл желекпен көмкерілді. Биыл Жетісу облысында 120 мың көшет егу жоспарланған.

Елдос Мырзабек, облыстық Табиғи ресурстар және табиғатты пайдалануды реттеу басқармасының басшысы:

- Осы жағалаудың бойында керемет жер босап тұр екен. Осы жерге ағаш егу дұрыс деп шешіп, бүгінгі күні соны жүзеге асырып жатырмыз.

Ал Таразда «Таза қала – таза аула» акциясы өтті. Шағын аудан тұрғындары өз ауласын күл-қоқыстан тазартып, тал-дарақ екті. Бұл бастама Қаратау, Жаңатас, Шу қалаларында де жалғасады. Тазалығымен көзге түскен аулаларға қаржылай сый беріледі. Жалпы биыл өңірде абаттандыру жұмыстарына 8,3 млрд теңге бөлінген.

Пернехан Бейсалиев, тұрғын:

- Тазалыққа өте біздің ауланың адамдары, жалғыз бүгін емес, сенбілік күні емес, күнде шығып, өздері ауланы таза ұстайды. Қаланың адамдарының бәрі өз аулаларын таза ұстаса, тазалық содан басталады.

Мамандар бұл бастама тұрғындар арасында экомәдениетті қалыптастырып, қоршаған ортаға деген көзқарасты өзгертуге сеп болатынын айтады.

Авторлары: Жандос Жұмабек, Ерболат Әбіш

Upd: 19.03.2025, 20:40