Балалар мәселелеріне әрдайым ерекше назар аударылатыны және олардың жағдайы Ұлттық құрылтайдың әрдайым назарында болуы аса маңызды.

Ұлттық құрылтайда Мемлекет басшысы балалардың әлеуметтік және құқықтық қорғалу жүйесін жақсартуға бағытталған маңызды тапсырмалар берді. Оның шеңберінде елімізде жаңа жоба қолға алынады. Caravan.kz медиа порталы толық тарқатады.

Бала құқықтары жөніндегі уәкіл Динара Зәкиева өзінің Facebook парақшасында аталмыш жобаның өзектілігін түсіндіріп берді. Ең алдымен, бұл – «Қазақстан балалары» бағдарламасы. Ол балаларды қорғау және қолдау механизмдерін біріктіріп, мәселелер мен шешімдердің кең ауқымын қамтымақ: балалар құқығын қорғайтын органдар мен инфрақұрылымды нығайту, зорлық-зомбылықтың, суицидтің және буллингтің алдын алу, денсаулық сақтау, білім беру, спорт, мәдениет және инклюзияны дамыту, әсіресе ауылдық жерлерде.

Сондай-ақ, балалардың қауіпсіздігін арттыру мақсатында заңнамаға қосымша өзгерістер енгізу қарастырылған.

Бағдарлама шын мәнінде барлық мемлекеттік органдар үшін бағдар болып, іс-қимылдар жоспарына айналмақ және балаларға қолайлы жағдай жасауға бағытталған бюджетті қалыптастырудың негізі болады.

«Мәселелердің бәрін ескеріп, пікірлерді жинақтау үшін әріптестерім аймақтық уәкілдер және ҚОПД өкілдерімен бірлесіп біз аймақтардың ҮЕҰ және сарапшыларын жұмылдырамыз», — деп жазды ол.

Мемлекет басшысы ерекше қажеттіліктері бар балаларды қолдауға да ерекше назар аударды.

Бүгінде елде 216 мың ерекше білім беру қажеттілігі бар бала бар, олардың басты арманы – қатарластарымен бірге білім алу. Осыған орай, оңалту орталықтары, дамыту орталықтары және мектептердегі инклюзивті кабинеттер қолжетімді болуы керек. Кейінгі жылдары «Қазақстан халқына» қоры «Самұрық-Қазына», «Қамқорлық» қорларымен және әкімдіктермен бірлесіп 42 оңалту орталығын және 7 аутизм орталығын ашты. 60 мың бала сол орталықтарда көмек алып, алғашқы қадамдарын жасады.

Үшінші маңызды бағыт – аймақтар мен ауылдық жерлерде футбол алаңдарын дамыту. Бұл балалардың денсаулығын нығайтып, жасөспірімдер арасындағы қылмыс, нашақорлық және лудомания деңгейін төмендетуге көмектеседі.

Төртінші бағыт – балалардың бойына кішкентай кездерінен дұрыс құндылықтарды сіңіру. Бұл олардың болашағы үшін маңызды. Сондықтан Мемлекет басшысының тапсырмасымен былтырдан бастап барлық мектепте «Біртұтас тәрбие» бағдарламасы енгізілді.

«Мемлекеттік кеңесші Қарин Е. Т. жетекшілік ететін жұмыс тобымен біз бағдарламаның іске асырылуын және сапалы енгізілуін қамтамасыз етудеміз. Сонымен қатар, балалар мен ересектердің түпкі мақсаттың елдің лайықты азаматы болу екенін түсінуі өте маңызды. Президент бағдарламаның атын «Адал Азамат» деп өзгерту орынды шешім болатынын атап өтті», — деп жазды уәкіл.

Кейінгі жылдары Қазақстанда Президент тапсырмасымен балалардың әл-ауқаты мен қауіпсіздігін қамтамасыз етуге бағытталған маңызды реформалар жүргізіліп, заңдар қабылданды. Бұл туралы біз ақпан айында Женевада БҰҰ және ЮНИСЕФ алаңдарында кездескен халықаралық сарапшылар мен ұйымдар да атап өтті.

Осылайша, «Ұлттық қор – балаларға», «Келешек», «Жайлы мектеп» бағдарламалары іске қосылды. Шалғайдағы аймақтарда оңалту орталықтары ашылып, «Қазақстан халқына» қоры ондаған әлеуметтік жобаларды жүзеге асыруда. Әйелдер құқығы мен балалар қауіпсіздігіне байланысты заң қабылданып, қамқоршылық органдары мамандарының санының нормативі бекітілді. Қазір біз Балалар құқықтарын қорғау басқармаларын құру бойынша жұмысымызды жалғастырудамыз, бұл қабылданған алдын алу шаралары мен заңдарды тиімді енгізуге мүмкіндік бермек.

Атқару қажет жұмыс әлі де көп, қабылданған шаралардың сапалы орындалуын қамтамасыз етіп, әр балаға жеткізу маңызды. Дегенмен, мықты негіз қаланды, маңызды шешімдер қабылдануда.

«Күнделікті нақты оқиғалар мен жағдайлармен жұмыс істеп, үдерістің ішінде жүргендіктен, біз бұл шешімдердің адамдардың тағдырына қалай әсер етіп жатқанын көріп жүрміз: балалар құтқарылды, отбасыларға қолдау көрсетілді, біраз адамның өмірі жақсы жаққа өзгерді», — деп толықтырды Динара Зәкиева.

Мысалы, ақпан айының өзінде «111» байланыс орталығы 9 мыңнан астам азаматқа көмек көрсетті, QR-код арқылы балалардан 11 мыңнан астам хабарлама қабылдады. Көмек қажет болған әрбір жағдайда тиісті жұмыс жүргізілді.

Қаңтар және ақпан айларында балалар арасында 12 қайғылы оқиғаның алдын алдық. Мобильді топтар 45 мың отбасына барды, 112 Отбасын қолдау орталығында 13 мың азамат көмек алды. Аймақтық уәкілдер күн сайын қорғауға мұқтаж балалармен жұмыс істеуде.