Заңсыз ойын бизнесін ұйымдастырушы Әзербайжаннан экстрадицияланды, — деп хабарлайды Massaget.kz тілшісі.

Бас прокуратура мен Қаржы мониторингі агенттігінің қызметкерлері ҚР Әзербайжандағы елшілігінің көмегімен қазақстандық әйелді заңсыз ойын бизнесiн ұйымдастырғаны үшін Әзербайжан Республикасынан экстрадициялады.

Ол 2023 жылы Алматыда адамдармен алдын ала сөз байласып, заңсыз ойын бизнесін ұйымдастырып, аса ірі көлемде пайда тапты деген күдікке ілінген. Қылмыс жасағаннан кейін күдікті жасырынып, оған халықаралық іздеу жарияланған.

Биыл қаңтарда ол Баку қаласында ұсталып, Қазақстан Республикасы Бас прокуратурасының сұрауы бойынша Отанына экстрадицияланды.

"Күдікті Алматы қаласының тергеу изоляторына қамалды. Бұл қылмысты жасағаны үшін мүлкін тәркілеп, төрт жылдан жеті жылға дейінгі мерзімге бас бостандығынан айыру жазасы қарастырылған", — деп жазылған хабарламада.

Өзекті жаңалықтарды өз уақытында оқу үшін Facebook парақшамызға жазылыңыз!