Келісім бірқатар бағыттар бойынша ынтымақтастықты көздейді.

Сенат Тәуелсіз Мемлекеттер Достастығына қатысушы мемлекеттердің сыбайлас жемқорлыққа қарсы іс-қимылдағы ынтымақтастығы туралы келісімді ратификациялады, деп хабарлайды inbusiness.kz сайты.

Құжатты сенатор Қайрат Тастекеев таныстырды.

Тиісті Келісімге 2022 жылғы 14 қазанда Астана қаласында Армения, Беларусь, Өзбекстан, Қырғызстан, Ресей, Тәжікстан және Қазақстан басшылары қол қойды.

Келісім бірқатар бағыттар бойынша ынтымақтастықты көздейді.

"Атап айтқанда, сыбайлас жемқорлық қылмыстары мен құқық бұзушылықтар туралы істер бойынша жәрдем көрсету, бірлескен жедел-іздестіру іс-шараларын жүргізу, сыбайлас жемқорлық қылмыстарын жасаған адамдарды ұстау және беру, сыбайлас жемқорлықтан түскен кірістерді іздестіруді және қайтаруды жүзеге асыру, арнайы ақпараттық жүйелерді құру және пайдалану. Келісім шеңберінде басқа да ынтымақтастық шаралары қарастырылған: кадрлардың біліктілігін арттыру, сыбайлас жемқорлыққа қарсы іс-қимыл саласындағы құқықтық реттеу тәжірибесімен, сыбайлас жемқорлыққа қарсы мониторинг нәтижелерімен алмасу, сыбайлас жемқорлыққа қарсы іс-қимыл мәселелері бойынша ынтымақтастық бағдарламалары мен жоспарларын әзірлеу", — деді Сенат депутаты.

Бұдан бөлек құжатта оның ережелерін іске асыратын қазіретті органдарды айқындау тәртібі, олардың өкілеттіктері, басқа тараптармен өзара іс-қимыл жасау тәсілдері де қарастырылған.

"Келісімде біздің заңнамадан ерекшеленетін ережелер бар. Осыған байланысты, Қазақстан тарабы Келісімге мынадай ескертпемен қол қойды: "Қазақстан Республикасы өзінің заңнамасына қайшы келмейтін бөлігінде осы Келісімнің 10-бабы а) тармақшасының, 12-бабының және 14-бабының ережелерін қолдану құқығын өзіне қалдырады деп мәлімдейді". Қазақстандағы автоматтандырылған ақпараттық, анықтамалық жүйелер мен деректер банктерінен ақпаратты құзыретті орган ретінде Сыбайлас жемқорлыққа қарсы агенттік ұлттық заңнаманың талаптарына қатаң сәйкес түрде, атап айтқанда, қозғалған қылмыстық істер шеңберінде және банктік, салықтық, коммерциялық құпияларды сақтай отырып алатын болады", — деді Қайрат Тастекеев.

Қазақстан өзінің заңнамасында келісімдегі тізбеден өзгеше сыбайлас жемқорлық қылмыстарының тізбесін қарастыруға құқылы.

Келісімді ратификациялаудан күтілетін оң құқықтық нәтиженің бірі – сыбайлас жемқорлықтан түскен кірістерді іздестіруді және қайтаруды жүзеге асырудағы өзара іс-қимылдың тиімді әрекет етуін қамтамасыз ету.