Бүгін, 20 наурызда Дүниежүзілік стоматологиялық қауымдастықтың (FDI) бастамасымен өткізілетін Дүниежүзілік ауыз қуысының денсаулығы күні (World Oral Health Day) атап өтіледі, деп хабарлайды Egemen.kz.

Мектепке дейінгі, орта білім беру ұйымдарындағы балалардың ауыз қуысын профилактикалық қарап-тексеру жыл сайын 2 жастан 17 жасқа дейін жүргізіледі. Соңғы жылдары Қазақстанда тексерілген 10 баланың 7-уіне тісжегі бар тістер диагнозы қойылған.

Осыған байланысты, былтыр Денсаулық сақтау министрлігі 2024-2028 жылдарға арналған «Болашаққа – сау тіспен» мектеп жасындағы балалардың стоматологиялық ауруларының профилактикасын жетілдіру жөніндегі жол картасын бекіткен.

Денсаулық сақтау министрлігінің мәліметінше мектептерде 145 стоматологиялық кабинет жұмыс істейді, 2025 жылы тағы 195 стоматологиялық аурулардың профилактикасы кабинетін ашу жоспарланып отыр.

Бүгінде еліміздің мектеп ұйымдарында стоматологиялық аурулардың профилактикасы бойынша фото және бейнематериалдарды, оқушыларға арналған ауыз қуысының гигиенасы сабақтарын, стоматолог дәрігерлерге, дантистерге және стоматологиялық гигиенистерге арналған ғылыми-практикалық конференцияларды пайдалана отырып, кең ауқымды санитариялық-ағарту жұмыстары жүргізіліп жатыр.