Бұл туралы Дональд Трамп пен Владимир Зеленский арасындағы телефонмен тілдесу барысында айтылған.

Қос тараптың сөйлесуі бір күн бұрынғы Путин мен Трамп арасындағы қоңырауға қарағанда шамамен екі есе аз уақытты қамтыды, деп хабарлайды inbusiness.kz сайты.

Еске салайық, онда Путин Украинаның энергетикалық инфрақұрылымына шабуыл жасамауға келіскенімен, толық 30 күндік бітімге қолдау білдіруден бас тартқан еді.

АҚШ президенті Дональд Трамп пен Украина президенті Владимир Зеленский Киев пен Мәскеу арасындағы бітімге қол жеткізу туралы конструктивті әңгіме өткізгенін мәлімдеді.

Ақ үйдің Мемлекеттік хатшы Марко Рубио мен ұлттық қауіпсіздік жөніндегі кеңесші Майк Уолц таратқан мәлімдемеге сенсек, Трамп Зеленскийге АҚШ-тың электр қуаты мен коммуналдық қызметтер саласындағы тәжірибесі арқылы бұл станцияларды басқаруда өте пайдалы бола алатынын айтқан.

Трамп аталған инфрақұрылымды қорғаудың ең тиімді жолы – американдық меншікке беру болуы мүмкін екенін жеткізген.

Бұл – АҚШ пен Украина көшбасшыларының ақпандағы Ақ үйдегі қызу пікірталасынан кейінгі алғашқы тікелей байланысы. Сол кездесуде Трамп пен оның вице-президенті Джей Ди Вэнс Зеленскийді АҚШ-тың әскери көмегіне жеткілікті алғыс білдірмеді деп сынаған еді.

Трамппен сөйлесер алдында Зеленский Путиннің шектеулі бітім туралы уәдесінің шындыққа сай келмейтінін ашық атап өтті.

– Кеше Путин Трамппен сөйлескеннен кейін Украинаның энергетикалық инфрақұрылымына шабуыл жасамауға бұйрық бергенін айтты. Бірақ өткен түні 150 дрон шабуыл жасады, оның ішінде энергетикалық нысандарға да соққы берілді, – деді Зеленский.

Ал Кремль Украина керісінше, Ресейдің мұнай инфрақұрылымына шабуыл жасағанын мәлімдеді.

Вашингтон бұл қоңырауларды "бейбітшілікке қадам" деп сипаттап, Қара теңізде теңіздік бітім орнату және ақырында толыққанды бейбітшілік орнатуға үміттеніп отырғанын жеткізді. Десе де, Путин өз шарттарынан бас тартқан жоқ, ал Киев бұл талаптарға үзілді-кесілді қарсы.

Зеленский Ресейдің талаптарына көну Украинаны әлсіретіп, соғысты жалғастыру қаупін тудыратынын мәлімдеді.

– Егер Ресей біздің нысандарымызға соққы жасамаса, біз де олардың нысандарын атқыламаймыз, – деп сөзін нақтылады ол.