Дербес деректер мен ақпараттық қауіпсіздік және электрондық цифрлық қолтаңбаны енгізу бойныша заңнаманы бұзғандарға айыппұлдар ұлғайтылды. Бұл туралы Орталық комуникациялар қызметі орталығында өткен брифингте Цифрлық даму министрлігінің өкілдері мәлімдеді. Бұрын ол 10-нан 1000-АЕК-ке дейінгі аралықта болса, қазір айыппұлдың шекті мөлшері 2000 АЕК-ке жетіп отыр.

Цифрлық даму министрлігі атап өткендей, азаматтардың дербес деректерінің таралуы жайлы хабарландыру рәсімі енгізілді. Елде ақпараттық және кибер қауіпсіздік бағытында қорғауға жататын 570-ден аса маңызды нысаннан бөлек мемлекеттік органдарда 350-ден астам ақпараттық жүйе жұмыс істеп тұр. Оның сыртында миллиондаған адам бар. Сондықтан киберсақтандыру жүйесін енгізу қажеттігі турасында бастама көтерілген.

Руслан Абдикаликов, ҚР ЦДИАӨМ Ақпараттық қауіпсіздік комитетінің төрағасы:

- Біз киберсақтандыру бастамасын ілгерілететін боламыз. Себебі қазір азаматтардың дербес деректерінің жариялануына жол берген тұлғаларға, мемлекеттік орган немесе өзге де мекемелерге айыппұл сомасы өседі. Бірақ дербес деректері қолды болған азаматқа одан келіп кетер не бар? деген қисынды сұрақ туындайды. Сол себепті киберсақтандыру жолға қойылса, азамат сақтандыру төлемақысын ала алады.

Upd: 20.03.2025, 20:02