Ақтөбе облысында қызыл судың қаупі жоғары 58 елді мекен ерекше бақылауға алынды.

Сондай-ақ 206 су шаруашылығы құрылымы қатаң назарда. Бұл туралы вице-премьердің өңірге жасаған сапары аясында айтылды. Қанат Бозымбаев Қобда ауданында қорғаныс бөгеттерін, Ойыл ауылында өзен арқылы өтетін көпірді және Қаратал ауылындағы қорғаныс бөгетін тексерді. Сондай-ақ Темір, Байғанин аудандарын да шолып шықты. Облыс әкімі Асхат Шахаровтың айтуынша, облыста 39 шақырымға жуық жаңа қорғаныс бөгеттері тұрғызылып, қолданыстағы 32 шақырым бөгет жөнделді. 155 су өткізу құрылымдары мен құбырлар орнатылып, 150 шақырымнан астам арықтар мен суағарлар тазартылды. Қанат Бозымбаев су қаупін азайту мақсатында өңір әкімдігі мен Төтенше жағдайлар министрлігіне су тасқыны жағдайына тәулік бойы мониторинг жүргізуді тапсырды.