Ыстанбұл мэрінің қамауға алынуына байланысты Түркияда наразылықтар басталған еді.

Түркия президенті Режеп Тайып Ердоған осы жағдайлардан кейін алғашқы мәлімдемесін жасады, деп жазады inbusiness.kz сайты.

Ердоған "оппозиция полиция мен сот жүйесіне саяси қысым көрсетуге тырысты" деп айыптайды. Ол оппозициялық күштердің "өз ішкі қақтығыстары мен заңға қатысты мәселелерін мемлекеттің басты проблемасы" ретінде көрсеткісі келетініне налиды.

– Біз оппозициямен айтысып-тартысуға уақыт жұмсамаймыз. Біз тек өз ісімізге назар аударамыз, мәселелерді шешуге және өз мақсаттарымызға жетуге талпынамыз. Оппозицияның өз ішкі қайшылықтары мен заң алдындағы мәселелерін мемлекеттің ең басты проблемасы ретінде көрсетуге тырысуы – екіжүзділіктің шарықтау шегі, – деді Ердоған.

Елдегі наразылықтар төрт күндік демонстрацияларға тыйым салынғанына және жолдардың жабылғанына қарамастан жалғасып жатыр. Бұған дейін мыңдаған адам қала ғимаратының алдына жиналып, Экрем Имамоғлуның қамауға алынуына қарсылық білдірді.

Сонымен қатар, Түркия билігі X, YouTube, TikTok және Instagram сияқты бірнеше әлеуметтік желіге қолжетімділікті шектеді.

Түркияның ішкі істер министрі Али Ерликаяның айтуынша, қақтығыстар салдарынан 6 полиция қызметкері жарақат алған.

Еске салайық, 19 наурызда Ыстанбұл мэрі Экрем Имамоғлу "сыбайлас жемқорлық, пара алу және алаяқтықпен айналысатын ұйымға қатысы бар" деген күдікпен қамауға алынды. Ол және оның жақтастары полиция бөлімшесінде енді 4 күн бойы қамауда болады.

Жаппай қамауға алулар мен шектеулердің салдарынан түрік лирасының бағамы күрт төмендеп, Ыстанбұл қор биржасының индексі айтарлықтай құлдырағаны белгілі болды.