Бұл арқылы олар өліп қалған үй жануарының тері үлгісін жинап, соған аумайтын клондалған түріне қол жеткізеді.

Қытайлықтар үй жануарларын клондауға 52 000 долларға дейін жұмсауға дайын, деп хабарлайды inbusiness.kz сайты South China Morning Post-қа сілтеме жасап.

Осылайша, клондау қызметтерін қолданудың арқасында сүйікті үй жануарларымен қайта қауышып отыр.

Үй жануарларын ұнататындардың бірі, Бейжіңде тұратын дизайнер – Лю Син. Ол он жылдан аса уақыт бұрын көшеден тауып алған мысықты асырап, оны "Томкэт" деп атағанын Science and Technology Daily мысалға келтіреді. 15 жыл бойы Томкэт оның адал серігі болды.

Мысық қартайып, денсаулығы сыр бере бастағанда, Лю оның медициналық процедураларына шамамен 100 000 юань (14 000 АҚШ доллары) жұмсады. Томкэттің жағдайы нашарлағанда Лю интернет арқылы үй жануарларын клондау қызметіне жүгінген.

Үй жануары өліп қалғаннан кейін, клондау компаниясы тез арада тері үлгілерін жинап, эмбрионды суррогат мысыққа салмақ болған. Десе де, бұл процесс екі рет сәтсіздікке ұшырайды. Бірақ, Лю ақыры өз мысығынан аумайтын клондалған марғауға қол жеткізеді.

Лю клондау қызметі үшін шамамен 140 000 юань (19 000 доллар) жұмсаған. "Бұл сол ақшаға тұрарлық шешім болды" дейді Лю.

Өткен жылы Қытайдағы үй жануарларының саны 124 миллионға жеткен. Негізінен Қытайда жануарларды коммерциялық клондауға рұқсат етілген, бірақ қызметтің танымалдығы артқан сайын қоғамда этика мәселелері де көтеріле бастады. Сонымен қатар, процедураның бағасы да күрт өскен.

Қазір клондау құны – 21-52 000 доллар аралығында.