Қарағандыдағы кадет мектебінің төртінші сынып оқушылары домбыраны шебер меңгерген, деп хабарлайды 24kz.

Олар қазақтың саз өнері тарихын терең біледі. «Дәулескер күйшілердің шығармаларын үйрету арқылы олардың бойында отансүйгіштік сезімді нығайтамыз», — дейді оқу орнының басшылығы.

Кадет мектебінің мына төртінші сыныбында домбырада ойнау дәстүрге айналған. Жаңа оқушы қабылданса, ол міндетті түрде ұлттық аспапты меңгеруі керек. Бұл бастаманы ата-аналар көтерген, ал оқушылар оны толық қолдайды.

Гүлім Ысқақова, Қарағанды қаласының тұрғыны:

- Баланың көзқарасы өзгерді. Бұрын мысалы биге бейім болатын болса, қазір домбыраға әуестігі артып келе жатыр. Ата-аналар өте қуанды. 1-2 сыныпта домбыраға қолдары да жетпей жатқан кездері де болды. Әрине, әлбетте, бір тастап, бір бастаған кездері де болды. Бірақ десе де, сол қазақи қанымыз сол нәтижеге алып келді.

Төрт жыл бұрын кадет мектебінің бірінші сыныбына түскен 22 оқушының барлығы да «Домбыра дастан» үйірмесіне қатысыпты. Содан бері зейінді шәкірттер жыл санап шеберліктерін шыңдаған. Бүгінде бұл сыныпты дайын оркестр десе де болады. Түрлі мерекелік шараларға белсене қатысады.

Ермек Әбдінәби, Қарағанды кадет мектебінің 4-сынып оқушысы:

- Қызық болып сезінем. Себебі саусақтарым өз-өзінен жұмыс істей береді. Маған домбыраның музыкасы ұнайды және дауысы ұнайды. Маған үйге жиі қонақтар келеді де, «домбыра тартып берші», дейді. Мен айтамын, жарайды деймін де, ойнап беремін. Сосын олар маған ақша береді.

Шәкірттер күн сайын сабаққа дейін 10 минутты домбыраға арнайды. Патриоттық туындыларды орындайды. «Осы арқылы тұтас тәулікке жетерлік күш-қуат жинайды», - дейді ұстаздары.

Дина Қасымова, 4-сынып жетекшісі:

- Сабаққа қоса домбыра үйірмесін алып жүру үлкен еңбек деп ойлаймын. Себебі бастауыштан бастап балаларға домбыра үйрету ол оңай шаруа емес. Оқушылардың қабілеті де әртүрлі ғой. Біреуі тез алып кетеді. Біреуі жылаған күндер де болды. Бірақ соған қарамастан, біз сыныптың барлық оқушыларын жаппай түгелдей қатыстыруға жұмылдырдық.

«Екі шектің бірін қатты, бірін сәл-пәл кем бұра. «Нағыз қазақ – қазақ емес, нағыз қазақ – домбыра», - демекші ұлттық ән-күйді, салт-дәстүрді меңгерту арқылы өскелең ұрпақтың бойында отансүйгіштік сезімді сіңіруге болады», - дейді оқу орны басшылығы.

Авторлары: Е.Жылқайдарұлы, Лиана Жамлиханова, Аман Хамит