Құралды толықтай қазақстандық мамандар ойлап тапты.

Қазақстандық мамандар цифрлық мониторинг және басқару жүйесін ойлап тапты. Әлемде теңдесі жоқ жүйенің көмегімен апаттық жағдайлар туралы жедел хабарлап, шахтерлерге төтенше жағдай туралы дер кезінде ескертуге болады, деп жазады inbusiness.kz сайты.

– Бұл жүйе шахталар мен өнеркәсіптік кәсіпорындарда қауіпсіздікті арттыру мақсатында әзірленді. Біздің негізгі модуліміз – позициялау жүйесі. Оның көмегімен жердің бетіндегі мамандар дәл қазір шахта ішінде кім, қай жерде екенін, қанша адам бар екенін және олардың орналасуын бақылай алады. Егер қандай да бір апат, опырылу болса, адамдарды тез арада табу және құтқару мүмкіндігі пайда болады, – дейді AG TECH жобалау кеңсесінің директоры Мадина Айтиева.

Бұл – толықтай қазақстандық мамандар әзірлеген құрал. Шахтада апат болса, диспетчерлер жүйе арқылы шахта ішіндегі қызметкерлерге болған жағдай туралы бірден хабарлай алады. Нәтижесінде нысандағы шахтерлердің жылдам эвакуациялануына мүмкіндік туады.

– Мысалы, "АрселорМиттал" шахтасындағы апатты айтайық. Сол кезде 50-ге жуық адам қаза тапты. Апаттан кейін оларды табу өте қиын болды, себебі қайдан іздеу керегін ешкім білген жоқ. Егер сол жерде позициялау жүйесі болса, іздеу радиусы бір шақырымға дейін қысқарар еді. Біздің позициялау жүйеміз 20 метрге дейінгі дәлдікпен анықтауға мүмкіндік береді, – дейді Мадина Айтиева.

Сонымен қатар, жүйе шахтадағы ауаның жағдайын да автоматты түрде өлшеп отырады. Қазіргі таңда қауіпсіздікті қамтамасыз ететін бағдарламаны еліміздің 30-дан астам ірі компаниясы кәсіптік қолданысқа енгізген. Оның ішінде "Косынка", "Кормета" және "Қазақмыс" кәсіпорындары да бар.