Қызылорда облысындағы Ғани Мұратбаев ауылының тұрғыны – ұлттық құндылықтарды дәріптеп, ата дәстүрді жаңғыртып жүрген жан. Гүлсім Бодықова жылқы бағып , қымыз дайындап, құрт-ірімшік әзірлейді, деп хабарлайды 24kz.

Күнделікті тұрмыстың қарбаласына қарамастан, ауыл келіндеріне білгенін үйретуге уақыт табады.

Нұрлан Жақыпбеков, тілші:

- Елу жастан асқан Гүлсім Бодықова күнделікті тіршілігін мал күтімінен бастайды. Қора-қопсыны реттеп, құдықтан су тартып, жем-шөп әзірлеу сияқты жұмыстарды нәзік болмысына қарамастан атқарып келеді. Алты баланың анасы жылқы өсіруді отбасылық кәсіпке айналдырған.

Нұрлан Жақыпбеков, тілші:

- Жылқы өсімтал мал, бірақ оның бабын жасау үшін ерекше бейнет керек. Осындай еңбекқорлық қасиетті көпбалалы ана Гүлсім Бодықованың бойынан байқауға болады. Бұл кісі күнделікті атқа қонып, әлі күнге дейін мал жайғайды екен.

Гүлсім Бодықова, Ғани Мұратбаев ауылының тұрғыны:

- Жалпы мен өзім бала кезден атқа отырдым. Бес жасымнан мотоцикл айдадым. Төрт түлік малдың бәрі ем. Қойдың жүнінде йод бар екен. Зиян нәрсенің бәрін киіз тартып алады. Екінші суық өткізбейді, үшінші омыртқадағы грыжа болдырмауға бірден бір ем екен.

Күнделікті күйбеңнің арасынан уақыт тауып, төрт түліктің адамға пайдасын дәріптеп жүрген Гүлсім Бодықова ауылдағы «Аналар мектебінің» мүшесі. Ұлыстың ұлы күніне орай ұйымдастырылған шарада ол жас келіндерге бесті қымыз бен құрт әзірлеудің қыр-сырын үйретті.

Гүлсім Бодықова, Ғани Мұратбаев ауылының тұрғыны:

- Бесті қымызды екі түрде ашытуға болады. Мейізге ашыған жақсы дейді. Ағаш күбісіне пісіп, осындай ұрпағымызға, келген қонақтарымызға тарту етеміз. Адамға өте пайдалы, бүкіл витаминдердің бәрі осы бесті қымыздың ішінде деп айтар едім.

Зәуре Ғалиева, Ғани Мұратбаев ауылының тұрғыны:

- Бұл құрттың қасиетін қазақтар жақсы біледі ғой. Балаларға тістеріне, кальций витаминдері көп. Бұның сақталуы ұзаққа сақталады. Өзінің құнарлығын жоймайды еш уақытта құрт.

Ұлттық құндылықтарды ұрпаққа мирас етуді көздеген көпбалалы ана енді ұмыт бола бастаған киіз басу өнерін жаңғыртуды жоспарлауда.

Авторлары: Нұрлан Жақыпбеков, Нұржан Мұзарапшин, Айтмұхамбет Байділдаев