Солтүстік Қазақстан облысында су тасқынын бақылау үшін қуатты дрондар қолданылады.

Заманауи техника мұз кептелісін, судың бағытын анықтап, жедел әрекет етуге мүмкіндік береді, деп жазады inbusiness.kz сайты облыстық әкімдікке сілтеме жасап.

Мамандар болжамынша, Петропавл қаласы мен 3 ауданда тасқын қаупі жоғары.

Жалпы облыс бойынша 116 елдімекен бақылауға алынды. Құтқарушылар тобы мен қажетті техника қауіпті аймақта тұрған аудандарға аттанады. Былтырғы тасқыннан кейін төтенше жағдай департаментінің техника паркі толықты. Жуырда Қарағанды қаласынан 50 әскери және арнайы техника жеткізіледі.

Дрондарға келсек, әр аппарат 7 шақырым қашықтыққа дейін ұзап, әуеде 45 минут жұмыс істей алады. Дрондар оқиға орнынан дер кезінде ақпарат алып, сала мамандарының жұмысын үйлестіруге көмектеседі.