Рейтингте 15 миллионнан аспайтын халқы бар шағын елдер көш бастаған.

Ал жер-жаһандағы ең бақытты 10 елдің жартысы – Еуропалық Одаққа мүше мемлекеттер, деп хабарлайды inbusiness.kz сайты.

2025 жылғы World Happiness Report есебімен Финляндия сегізінші мәрте әлемдегі ең бақытты ел деп танылып отыр. Сарапшылар бұған табиғатқа жақындық және мықты әлеуметтік қамсыздандыру жүйесі әсер еткеніне баса назар аударады.

Одан кейінгі орындарға Дания, Исландия және Швеция жайғасқан.

Аталған елдер әлеуметтік қолдау, сенім деңгейі және жалпы әл-ауқат көрсеткіштері бойынша тұрақты түрде жоғары баға алып келеді.

World Happiness Report зерттеуіне 140 ел және 100 мыңнан аса адам сауалнамаға қатысқан.

HappyOrNo фин компаниясының бас директоры Миика Мякитало бақыттың мәні туралы былай дейді.

– Финляндиядағы бақыт – бұл үнемі қуанышта жүру емес, керісінше, қауіпсіздік, сенім және күнделікті өмірдегі тепе-теңдік сезімі. Егер қажет болса, бізге әрдайым қолдау көрсетілетінін білу – бұл әлеуметтік саясаттың беріктігі.

Қоғам ретінде біз теңдік пен тұрақтылықты бағалаймыз, бұл адамдарға өзін қолдау көргендей сезінуге және дамуға мүмкіндік береді. Балаларға арналған демалысқа төленетін жәрдемақы мен қолжетімді балабақша сияқты саясат отбасыларға қаржылық қауіпсіздік пен балаларына көбірек уақыт бөлу мүмкіндігін береді. Бұл жалпы өмір сапасына және жұмыс пен жеке өмір арасындағы тепе-теңдікке оң әсер етеді, – деп атап өтті ол.

Зерттеулерден ортақ ас ішу дәстүрі бар қоғамдарда бақыт деңгейі мен әлеуметтік қолдау жоғары екенін байқауға болады.

Польша – алғашқы ондыққа кірген ЕО-дағы жалғыз ел. Онда тұрғындар орта есеппен аптасына 10 рет біреумен бірге тамақтанады екен. Ал Эстония тізімнің соңында, өйткені мұнда адамдар аптасына орта есеппен 2,7 рет ғана бірге ас ішеді.

Еуропада ең жоғары бақыт деңгейі төрт-бес адамнан тұратын отбасыларда да кездеседі. Өкініштісі, жастар арасында жалғыздық деңгейі артып келеді. Сауалнамаға қатысқандардың 19%-ы сенетін адамы жоқ екенін айтқан.

Орталық және Шығыс Еуропада қайырымдылық пен еріктілік кең тараған болса, Батыс Еуропада материалдық ресурстармен бөлісу жиірек кездеседі.

Оксфорд әл-ауқат зерттеу орталығының директоры және World Happiness Report бас редакторы Ян-Эммануэль де Неве баяндаманың басты тұжырымын былай деп түйіндейді.

– Биылғы есеп бізді дәстүрлі факторлар – денсаулық пен байлықтан тыс ойлануға итермелейді. Зерттеу көрсеткендей, ортақ ас ішу мен адамдарға деген сенім күтілгеннен де күшті бақыт көрсеткіштері болып шықты. Әлеуметтік оқшаулану мен саяси бөліну дәуірінде адамдарды бір дастарқан басына қайта жинаудың жолдарын табу – біздің жеке және ұжымдық әл-ауқатымыз үшін өте маңызды, – деді ол.

Бұған дейін Қазақстанның аталған рейтингте қай орынға жайғасқанын жазған едік.