Арыз Инвестициялық дауларды реттеу жөніндегі халықаралық орталықта (ICSID) тіркелді.

Британиялық Victoria Oil&Gas мұнай компаниясы Энергетикалық хартия ережелеріне сүйене отырып, Қазақстанға қарсы талап-арыз берді, деп жазады inbusiness.kz сайты.

Energy Monitor қоғамдық қорының Telegram арнасының мәліметінше, компания 2021 жылдың сәуір айында Қазақстаннан жүздеген миллион доллар талап ететінін мәлімдеген. Бұл талап Атырау облысындағы Кемеркөл кен орнын барлау және игеру туралы келісімшарттың бұзылуына байланысты туындаған.

Аталған қорға жетекшілік ететін сарапшы Нұрлан Жұмағұлов бұл мәселенің тек экономикалық емес, саяси астары да бар екенін атап өтті.

– Боранкөл мен Толқын кен орындары бойынша қозғалған Стати ісімен салыстырғанда, Кемеркөл кен орны жүздеген миллион доллар шығынды ақтайтындай ауқымды емес. Сондықтан бұл талап-арыздың экономикалықтан гөрі саяси мәні басым деп ойлаймын, – деді ол.

Оның айтуынша, Victoria Oil&Gas 2005 жылы Saga Creek Gold Ltd компаниясынан Кемеркөл кен орнының 100% үлесін 8,5 миллион долларға сатып алған. Компания бірнеше ұңғыма бұрғылап, мұнай қоры 15 миллион тонна көлемінде деп бағалаған. Алайда 2008 жылы жер қойнауын пайдалану жөніндегі келісімшарт еш түсіндірілместен күшін жойған.

Кейіннен Кемеркөл кен орны Bakyt Tau ЖШС-не 360 миллион теңгеге, ал 2016 жылы Ап-Нафта Оперейтинг ЖШС-не 1,36 миллиард теңгеге сатылған.