Түркияның бірнеше қаласында үкіметке қарсы жаппай шерулер алты күннен бері жалғасуда, деп хабарлайды Euronews.

Мыңдаған адам Ыстанбұл мэрі Экрем Имамоглының босатылуын және мерзімінен бұрын президенттік сайлау өткізуді талап етіп, Ыстанбұл қалалық әкімшілігінің алдына жиналды, деп жазады inbusiness.kz сайты.

Ердоған шерулерге жауап берді.

Түркия президенті Режеп Тайып Ердоған шерушілерді қоғамдық тәртіпті сақтауға шақырып, оппозициялық Республикалық халық партиясын (CHP) жағдайды ушықтыруға тырысуда деп айыптады.

— Мен бұл үндеуді бірнеше рет жасадым, бүгін де қайталаймын: арандатушылықты тоқтатыңыз, азаматтарымыздың тыныштығын бұзбаңыз! – деді Ердоған үкімет отырысынан кейінгі теледидарлық үндеуінде.

Сонымен қатар, президент Республикалық халық партиясының төрағасы Озел Озгурдің шерулер үшін заң алдында жауап беретінін ескертті.

— Әрине, бұл әрекеттер парламентте саяси жауапкершілікке, сотта заңды жауапкершілікке алып келеді, – деді Ердоған.

Имамоглу не үшін қамауға алынды?

Еске салсақ, 19 наурыз күні Ыстанбұл мэрі, Ердоғанның басты саяси қарсыластарының бірі Экрем Имамоглуны қамауға алу туралы ордер шыққан болатын. Бұл жағдай Түркияда ірі наразылық шерулеріне түрткі болды.