Көрші елде осындай нормаларды енгізу мәселесі пысықталып жатыр.

Өзбекстан президенті Шавкат Мирзиёев мемлекеттік қызметшілердің кірістерін декларациялау туралы заңның қабылдануын жеделдетуді тапсырды, деп хабарлайды inbusiness.kz сайты gazeta.uz басылымына сілтеме жасап.

Аталмыш жүйені 2022 жылдан бастап енгізу жоспарланған. Енді құжатты 1 сәуірге дейін қарауға енгізу тапсырылды.

Көрші ел басшысының сөзінше, мемлекеттік қызметкерлердің кірістерін декларациялау туралы заңды қабылдайтын уақыт келді. Бұл туралы Шавкат Мирзиеев Сыбайлас жемқорлыққа қарсы іс-қимыл жөніндегі ұлттық кеңестің кеңейтілген отырысында мәлімдеген.

Оның сөзінше, бұл мәселеде халықтың пікірі үлкен маңызға ие.

Ол тиісті ведомстволарға заң жобасын қысқа мерзімде қоғамдық талқылауға жариялауды және оны 1 сәуірге дейін қарауға енгізуді тапсырды.

"Сыбайлас жемқорлықты жеңу үшін ең әуелі оның тамырын, яғни шектен тыс сән-салтанатты түбірімен жоюымыз қажет", — деді Өзбекстан президенті.

Бұдан бөлек қолданыстағы заңнамаға заңсыз байыту туралы бап енгізу ұсынылды. Яғни, мемлекеттік қызметші өзінің декларацияланған кірістеріне сай келмейтін мүліктің шығу тегін дәлелдеуі тиіс.