Мұқым мұсылман үшін күндердің сұлтаны жұма болса, түндердің қайырлысы — қадір түні. Қасиетті Құранда Қадір түнінің нақты уақыты айтылмайды, әл-Бұхари хадисінде Рамазан айының соңғы 10 күніндегі тақ түндердің бірі екені айтылған. Көпшілігі мұны Оразаның 27-ші түні деп санайды, деп жазады Egemen.kz.

Осыған сай Қазақстан мұсылмандары діни басқармасы 2025 жылғы діни мерекелер кестесінде 26-наурыздан 27-сіне қараған түнді Қадір түні деп белгілеген болатын.

Қадыр түні — қазақша атауы, араб тілінде Ляйлятуль-Кадр немесе Аль-Кадр деп те айтылады. Қадір түні – берекелі Рамазан айында келетін қасиетті түн. Рамазан айының соңғы он түні мұсылман үшін өте маңызды. Себебі Қадір түнінде қасиетті Құран Кәрім түсе бастады. Сондықтан Ислам дінінде бұл түн ерекше бағаланады. Құран Кәрімде «Қадір» сүресі бар. Осының өзі-ақ бұл түннің аса ардақты екенінен хабар береді.

Мұсылман қауымы бұл қасиетті түннің қазынасынан құр қалмауға тырысады. Осы түні тәнді толық тазартып, құлшылықтарды көбейтіп, Құранды көбірек оқып, дұға-тілектер жасау абзал болмақ.

ҚМДБ Рамазан айының соңғы он күнінде және Қадір түнінде мына дұғаны оқуды мысал етеді: «Айша анамыз Пайғамбарымыздан (оған Алланың салауаты мен сәлемі болсын): «Уа, Алланың елшісі! Егер мен Қадір түнінің басталғаны туралы білсем не айтуым керек», деп сұрайды. Сонда Пайғамбар: «Уа, Алла! Расында, Сен – Кешірімдісің, кешіруді жақсы көресің. Мені кешіре гөр», деп айт деп үйретеді. Оқылуы: «Аллаһуммә иннәкә Ъафуун, тухиббул-ъафуа фаъфу-ъанни».

Дін өкілдері осы түні Жаратушыға (с.ғ.с.) бар ықыласымен сыйынған пенде ғұмыр бойы құлшылық еткен болып саналатынын айтады.

Қадыр түнін үйде немесе мешітте өткізеді. Түнді жалғыз да, жамағатпен де қарсы алуға болады.

Бұл түні жаман әдеттерден тыйылу керек. Ғайбат, бос әңгімеден бойды алыс ұстап, қасиетті түнді фильмдер мен ойын-сауық хабарларын тамашалап өткізбеген жөн.