Бүгін Мәжілістің жалпы отырысында «Ауыл» партиясының Аграрлық мәселелер жөніндегі комитет мүшелері Атырау облысындағы суармалы жерлер мен елді мекендер арасындағы жол сапасына қатысты мәселе көтерді, деп жазады Egemen .kz.

Депутаттық сауалда Атырау облысының Исатай ауданында орналасқан Бақсай, Нарын және Сборный суару арналарының техникалық жағдайын жақсарту арқылы суармалы егіншілікті дамыту туралы айтылды.

Бүгінде облыстағы 3,2 миллион гектардан астам ауыл шаруашылығы жерінің 5 321 гектары ғана суармалы жерлер. Бұл жалпы әлеуеттің 33 пайызынан төмен.

«Негізгі себеп — су шаруашылығы инфрақұрылымының тозуы, су арналарындағы өткізгіштік қабілеттің төмендеуі, механикалық тазарту жұмыстарының жүйелі түрде жүргізілмеуі, автоматтандыру деңгейінің төмендігі және білікті кадрлардың жетіспеушілігі. Бұл мәселелер судың мақсатты тұтынушыға жетпей, ысырап болуына әкеліп соқтыруда. Атап айтқанда, аталған су арналары тереңдету, түбін тазарту, жағалауларын нығайту, су реттегіш құрылғыларын жаңарту және күрделі жөндеу жұмыстарын қажет етеді, лай, балдыр, қамыс пен басқа бөгеттердің жиналуы нәтижесінде су айналымы бұзылып, ауыл шаруашылығы жерлерін сумен қамту мүмкіндігі шектеліп отыр. Бұл жағдай Аққыстау, Жанбай, Зинеден және басқа да ауылдардағы егіншілік пен мал шаруашылығының дамуына кері әсерін тигізіп жатыр», деп атап өтті «Ауыл» партиясының Аграрлық мәселелер жөніндегі комитет мүшесі Ж. Дайрабаев.

Аталған су арналары- осы өңірлердің әлеуметтік-экономикалық өмірінің өзегі. Сондықтан депутаттар Су ресурстары және ирригация министрлігіне мына мәселелерді шешуді ұсынды:

«Суармалы арналарды қалпына келтіру бойынша кешенді техникалық-экономикалық негіздеме дайындау; Мемлекеттік-жекеменшік әріптестік тетіктерін қолдана отырып, су үнемдеу технологияларын (тамшылатып және жаңбырлатып суару) енгізу; Қосымша су жинақтаушы қоймаларды салу және су тасқыны кезінде суды тиімді пайдалану жүйесін құру; Су арналарының бойындағы инженерлік инфрақұрылымды цифрландыру және автоматтандыру; Су шаруашылығы саласындағы кадрлық әлеуетті арттыру және мамандар даярлау жүйесін жетілдіру», деді Ж. Дайрабаев.

Комитет мүшелері өңірдегі Исатай ауданына қарасты шалғай жатқан Қызыл үй және Жасқайрат елді мекендері тұрғындарының осы ауылдарға баратын жолдың жағдайына және халыққа уақытылы медициналық жедел жәрдем көрсетуге қатысты көтеріп жатқан мәселелерге облыс әкімі Серік Шәпкеновтің назар аударуын сұрады.

«Исатай ауданынан Қызыл үй және Жасқайрат ауылдарына баратын ауыларалық автомобиль жолдарын салуды қолға алу. Қызыл үй және Жасқайрат ауылдары тұрғындарына медициналық көмек көрсету үшін арнайы жедел жәрдем көлігімен қамтамасыз ету. Осы, аталған шаралар ауыл шаруашылығы өндірісін дамытуға, жаңа жұмыс орындарын ашуға, су ресурстарын тиімді пайдалануға және ауыл тұрғындарының тұрмыс сапасын жақсартуға септігін тигізетіні сөзсіз», деді депутат.