2021-2024 жылдары сайланған ауыл әкімдерінің 70 пайыздан астамы бұл лауазымға бірінші рет отырған.

Әрі олардың 97 пайыздан астамы сайлау қорытындысынан соң ауыл әкімі болған, деп жазады inbusiness.kz сайты.

Мұндай деректі Орталық коммуникациялар қызметінің алаңында өткен жиында Ұлттық экономика вице-министрі Бауыржан Омарбеков айтып берді.

– Мемлекет басшысының тапсырмасына сәйкес, елде ауылдық округ әкімдерін тікелей сайлау жүйесі енгізілді. 2021-2024 жылдары 2 641 әкім сайланды. Олардың 70 пайыздан астамы бұл лауазымға алғаш рет келді. Жалпы алғанда, 97 пайыздан астам ауыл әкімдері сайлау арқылы қызметке келді, – деді ол.

Вице-министр Президент жанындағы Мемлекеттік басқару академиясы мен "Аманат" партиясы Ұлттық экономика министрлігінің қолдауымен қалалар, ауылдар мен кенттер әкімдерін қайта даярлау бағдарламасын әзірлегенін ерекше атап өтті.

– Бағдарламаның негізгі мақсаты – жергілікті өзін-өзі басқару мәселелерін тиімді шешу, әкімдердің кәсіби және басқарушылық құзыреттілігін арттыру арқылы өңірлердің тұрақты әлеуметтік-экономикалық дамуын қамтамасыз ету. Оқу қорытындысы бойынша қатысушылар ауылдық округтердің экономикалық дамуының бағдарламаларын әзірлейді. Қазіргі уақытта бағдарлама аясында 17 өңірден 1 815 ауыл әкімі білім алып жатыр, – деп қоса кетті ол.

Бұған дейін Мемлекет басшысы Ұлттық құрылтайда биылдан бастап барлық аудан әкімін халық тікелей сайлайтынын айтқан еді.