Қазақстан құрамасы бас бапкерінің міндетін атқарушы Әли Әлиев наурыздағы қос ойынды қортындылап, құраманың ілгері басуына қажетті ой-пікірлерін алға тартты.

Қазақстан құрамасының бас бапкерінің міндетін атқарушы Әли Әлиев Лихтенштейндегі жеңіспен жанкүйерлерді құттықтады.

Сондай-ақ ол екінші жүздікке кіретін командамен ойындағы қиындықтар туралы сөз қозғады.

- Біз қарсыласымыздың күшін жақсы білдік. Лихтенштейннің қандай команда екенін түсіндік. Олардың бізге территорияны беретінін білдік. Ал біз оны пайдалануға тиіс едік. Қарсыласты менсінбей қоюдан қорықтым. Егер олар бізге допты бақылауға мүмкіндік берсе, оны жылдам пайдалануымыз керек деп ойладық. Өкінішке қарай, матчтың басында жігіттерде қобалжу болды. Өйткені олар мұндай сәттермен сирек кездеседі. Біз бірінші таймда гол соғып, екінші голмен басымдықты қолға алдық. Жұмысымызды жалғастырамыз. Жігіттер мұндай қарсыластардың сирек кездесетінін түсінуі керек. Енді мүлде басқа деңгейге дайындалуымыз қажет. Баршаңызды жеңіспен құттықтаймын!

– Өзбекстан әлем чемпионатына шығуға жақын. Ал біз алғашқы 40 минутта қарсылас қақпасына бірде-бір соққы жасай алмадық. Біз қашан көршілеріміз секілді ойнаймыз?

- Біріншіден, Қырғызстан мен Өзбекстан үш орталық қорғаушымен ойнады. Екіншіден, егер біз Азияда ойнасақ, әлем чемпионатына шығар едік. Азия футболын асыра мақтаудың қажеті жоқ. Мен Өзбекстан құрамасының Жапония мен Кореямен бір топта болғанын көрген емеспін.

Біз мүлде басқа нәрсе туралы айтып отырмыз. Уэльс пен Македонияны көрдіңіздер. Македония осында келіп үш гол соқты. Ал біз екі гол соқтық. Бірақ біз жас ойыншыларды шығардық. Олар әлі тәжірибе жинаған жоқ. Мен түсінбеймін… Бүгін біз жеңіске жеткенімізге қуануымыз керек. Өйткені қаншама матчта бұлай болмады. Біз талдау жасаймыз, бәрін қарастырамыз.

Қырғызстан мен Катар матчын тамашаладым. Катар жәй ғана алаңда жүрді, ештеңе жасағысы келмеді… Ал біз бүгін қуануға тиіспіз. Біз Дастан Сатпаевты шығардық, Ғалымжан Кенжебекті алаңға жібердік, Наурызбек Жағоровқа мүмкіндік бердік. Бізге уақыт керек. 2:0 есебімен жеңдік. Келесі ойынға дейін екі ай бойы мақтана аламыз.

– Дастан Сәтпаевтың ойынына қандай баға бересіз?

– Сәтпаевқа келсек, біз оның жылдамдығын есепке алдық. Біздің жоспарымыз болды. Самородов, Чесноков және Сәтпаев – бәрі жылдам ойыншылар. Екінші таймда Кенжебек пен Астанов шығып, қарқын қоса түсуі керек еді. Сонымен қатар, Дастан орталық қорғаушыға қысым жасауы қажет болды. Бірақ оның жасы небәрі 16-да, кей сәттерде оған қиын. Ол енді ғана ҚПЛ-да ойнай бастады.

Айта кетейік, Қазақстан құрамасы сырт алаңда Лихтенштейнді 2:0 есебімен жеңді. Ұлттық команда сапынан Максим Самородов пен Александр Марочкин мергендік танытқан болатын. Енді Әли Әлиевтің шәкірттері 9-маусымда өз алаңында Солтүстік Македонияны қабылдайды. Одан кейінгі кездесу қыркүйектің төртінде Уэльске қарсы өтпек. Бұл матч Қазақстанда өтеді. Әзірге ұлттық құрама екі турдан кейін 3 ұпаймен үшінші сатыға жайғасты.