Жалпы, 1991 жылдан бері Қазақстанға 1 млн 150 мыңнан астам этникалық қазақ қоныс аударған, деп хабарлайды Egemen.kz.

Еңбек және халықты әлеуметтік қорғау министрлігінің мәліметінше, жыл басынан елге қандастардың 46,4% – Қытайдан, 41% – Өзбекстаннан, 7,1% – Түрікменстаннан, 1,9% – Ресейден, 1,6% – Монғолиядан және 2% басқа елдерден келген.

«Осы жылғы 1 наурыздағы жағдай бойынша еңбекке қабілетті жастағы этникалық қоныс аударушылар саны 60,8%-ды, кәмелетке толмағандар 30,8%-ды және зейнеткерлер 8,4%-ды құрайды. Еңбекке қабілетті жастағы қандастардың ішінен білім деңгейі бойынша 16,8%-ы жоғары білімді, 30,7%-ы орта кәсіби білімді, 50,8%-ы жалпы орта білімді және 1,7%-ының білімі жоқ», делінген хабарламада.

Айта кетейік, этникалық қазақтар еліміздің түрлі өңірлеріне қоныстанған. Оларды орналастыру үшін еңбек күші тапшы Ақмола, Абай, Қостанай, Павлодар, Атырау, Батыс, Шығыс және Солтүстік Қазақстан облыстары белгіленген.

«Қоныстандыру өңірлерінде 2025 жылға арналған қандастарды қабылдау квотасы 2 309 адамды құрайды. 2025 жылғы 1 наурыздағы жағдай бойынша қоныстандыру өңірлеріне 389 қандас қоныс аударды. Жоғарыда аталған өңірлерде қоныстанған қандастарға көшуге субсидия түрінде мемлекеттік қолдау шаралары ұсынылады – бір мезгілде отағасына және отбасының әрбір мүшесіне 70 АЕК (275,2 мың теңге) мөлшерінде; тұрғын үй жалдауға және коммуналдық қызметтерге ақы төлеуге – бір жыл ішінде 15-тен 30 АЕК (59-дан 118 мың теңгеге дейін) мөлшерінде», деп хабарлады министрліктің баспасөз қызметі.

Айта кетейік, жыл басынан бері 84 қандасқа түрлі қолдау шаралары көрсетілген. Атап айтсақ, 56 адам тұрақты жұмысқа орналастырылған.

Сонымен қатар, қоныстанушыларға тұрғын үй сатып алу, салу немесе ипотекалық қарыздың бастапқы жарнасын төлеуге экономикалық ұтқырлық сертификаты беріледі. Бұл сертификат тұрғын үй құнының 50%-ын немесе бір отбасы үшін 4,56 млн теңгеге дейінгі соманы өтеусіз және қайтарымсыз негізде жабуға мүмкіндік береді.