Олжас Бектенов Екібастұз ГРЭС аумағында энергетиканы дамыту мәселелері бойынша республикалық кеңес өткізді, деп хабарлайды 24kz.

Премьер-министр ГРЭС-1 және ГРЭС-2 станцияларын жаңғырту нәтижелерімен танысты. Сондай-ақ Үкімет басшысына ГРЭС-3 станциясын салу жобасы туралы баяндалды. Екібастұз энергия торабының қуаты 5 мың МВт-қа жетеді, бұл Екібастұзды электр энергиясын өндіруде стратегиялық маңызды орталыққа айналдырады. Жалпы республикадағы электр энергиясының 40%-тен астамын Павлодар облысы өндіреді. Кеңесте жаңа қуат көздерін іске қосу және энергия тиімділігін арттыру талқыланды. Қазір елде 227 электр станциясы жұмыс істейді. Бірақ олар 56%-ке тозған. Энергетика министрі Ерлан Ақкенженовтің айтуынша, былтыр 771 МВт жаңа қуат көзі іске қосылды. Биыл 621 МВт, ал 2026 жылы 2,6 ГВт қосу жоспарланған. Сондай-ақ KEGOC компаниясы 2027 жылға дейін батыс аймақтың электр желілерін Бірыңғай электр энергетикалық жүйеге біріктіру жұмыстарын жүргізеді.