Премьер-министр орынбасарының айтуынша, олардың қызметі заңмен регламенттелген.

Блогерлердің табысына қатысты сауал жолдаған депутаттар Ерлан Саиров пен Үнзила Шапаққа жауап берген үкімет басшысының орынбасары Серік Жұманғарин қазіргі таңда олардың қызметі заңмен реттелгенін және олар цифрлық ортада құқық бұзатын болса, заң алдында жауап беретінін айтты.

Үкімет өкілінің сөзінше, блогер не инфлюенсерлердің қызметі "Онлайн платформалар және онлайн жарнама туралы", "Лотерея не лотереялық қызмет туралы", "Жарнама туралы", "Ойын бизнесі туралы", "Рұқсатнамалар және хабарламалар туралы" заңдарымен регламенттелген. Бұл заң талаптарының сақталуына Мәдениет және ақпарат министрлігі күндіз-түні мониторинг жасайды.

Еске салайық, таяуда Мемлекеттік кірістер комитеті қазақстандық блогерлер 53,3 млрд теңге табысын жасырғанын хабарлады. Кейін олардың бірқатары 1,4 млрд теңге табыстан 73 миллион теңгеден астам салық төлегені белгілі болды.

"Кей блогерлер әлеуметтік желіде қымбат вилла, суперкар және байлықтың басқа да нышандарын салу арқылы қоғамда еңбексіз, жеңіл жолмен көп ақша табуға болатыны туралы жалған түсінік қалыптастырып отыр. Ал Қаржы министрлігі бұл азаматтардың салықты толық төлемегені туралы ақпаратты ұсынды. Салықты бәрі төлеуге тиіс. "Заң қатал, бәрақ ол заң" деген қағида бәріне ортақ", – делінген депутаттық сауалда.

Оқи отырыңыз: "Бақытқа жету жолын көрсетемін дейді". Мәжіліс депутаты үкіметтен инфо бизнесті қадағалауды сұрады