Денсаулық сақтау министрлігінің баспасөз қызметі хабарлағандай, бұл рейтинг ТМККК және МӘМС жүйесінде жұмыс істейтін барлық медициналық ұйымдар мен ғылыми орталықтарды қамтиды.

Қазақстанда 2024 жылдың қорытындысы бойынша медициналық ұйымдар мен ғылыми орталықтардың рейтингі жарияланды, деп жазады inbusiness.kz сайты.

Рейтингке 20 өңірдегі 772 медициналық ұйым кірді, оның ішінде ғылыми-зерттеу институттары, көпбейінді стационарлар, балаларға арналған стационарлар, перзентханалар мен перинаталдық орталықтар, онкологиялық орталықтар, туберкулёзге қарсы диспансерлер, психикалық денсаулық орталықтары және аудандық ауруханалар қарастырылған. Әдістемеге сәйкес, рейтингті есептеу кезінде 14 клиникалық индикатор, аккредиттеу мәліметтері және шағымдар саны ескерілді.

2024 жылдың үздік медициналық мекемелері арасында Қазақстанның жетекші ғылыми орталықтары "Акушерлік, гинекология және перинатология ғылыми орталығы" (Алматы), "Ұлттық хирургия ғылыми орталығы" (Алматы), "Ұлттық ғылыми медициналық орталық" (Астана) болды. Сонымен қатар, онкология саласында Алматы қаласының "Алматы онкология орталығы", "Қазақ онкология және радиология ғылыми-зерттеу институты" және Шығыс Қазақстан облыстық "Онкология және хирургия орталығы" үздік атанды.

Ересектерге арналған көпбейінді стационарлар арасында Қарағанды қаласының №1 көпбейінді ауруханасы, Қонаев қаласының көпбейінді ауруханасы және Астана қаласының №2 көпбейінді ауруханасы көш бастады. Ал балалар стационарлары арасында Алматы қаласының №2 балалар клиникалық ауруханасы, Қызылорда облысының көпбейінді балалар ауруханасы және Қарағанды қаласының балалар ауруханасы үздік көрсеткіштерге ие болды.

Аудандық ауруханалар арасында үздік атанған мекемелердің қатарында Абай аудандық ауруханасы (ШҚО), Әйтеке би аудандық ауруханасы (Ақтөбе облысы) және Хромтау аудандық ауруханасы (Ақтөбе облысы) бар.

Медициналық-санитарлық алғашқы көмек (МСАК) ұйымдарының арасында Астанадағы Республикалық медициналық-санитарлық алғашқы көмек орталығы, Алматы қаласының №17 қалалық емханасы, БҚО әкімдігі ДСБ "№4 қалалық емханасы" және басқа да үздік емханалар анықталды.

2023 жылдан бастап Қазақстандағы медициналық ұйымдардың рейтингін жаңартылған әдістеме бойынша бағалау жүргізілуде. Бұл әдістеме медициналық көмек көрсету сапасын саралауға мүмкіндік береді.