Дәрігерлер "дерттің алдын алудың бір жолы – уақытылы тексерілу " деп отыр.

Соңғы 5 жылда Түркістан облысында онкологиялық аурулардың жаңадан анықталуы 21,6 пайызға артқан, деп жазады inbusiness.kz сайты.

Аурушаңдық көбіне Ленгір мен Арыс қаласында және Бәйдібек, Ордабасы, Отырар аудандарында жоғарғы болып тұр. Бір ғана мысал, Кентау қаласында былтыр 85 науқас "Д" есебіне алынған. 2020 жылмен салыстырғанда көрсеткіш 56,2 пайызға көп.

Ақ халаттылар қаладағы халық санының азаюына байланысты жаңадан анықталған науқастардың саны төмендеп, көрсеткіші жоғарылағанын айтады.

Негізінен онкологиялық аурулардың алдын алудың ең тиімді жолы скринингтік және профилактикалық тексерулермен халықты толықтай қамту болып саналады.

– Онкологиялық аурулар бойынша жылдан-жылға өсім байқалады. Өсу барысы бірінші, екінші деңгей болса, ол – уақытылы анықталып жатыр деген сөз. Бұл жағдайда науқасты емдеуге, жасын ұзартуға болады. Ал, анықталмай, өлім көрсеткіші өсіп, аурушылар төмендесе, бұл – өте қауіпті. Сондықтан, өлім көрсеткішінің төмендеп, науқастанушылардың көп анықталуына мән беру керек, – дейді Түркістан облыстық денсаулық сақтау басқармасының басшының орынбасары Бауыржан Сатыбалды.

Түркістан қаласында 41 сүт безі қатерлі ісігі, 24 асқазан қатерлі ісігі, 23 жатыр мойны қатерлі ісігі, 22 өкпе қатерлі ісігі, 19 терінің қатерлі ісігі тіркелген. Ал, онкологиялық аурудан 5 жыл ішінде өңірде 4234 адам дүниеден өткен. Яғни, 2020 жылы 943, 2021 жылы 930, 2022 жылы 879, 2023 жылы 810, 2024 жылы 672 адам қайтыс болған.